Qazaqstan alańynda metallýrgııa, hımııa, jeńil ónerkásip jáne farmasevtıka, qurylys ındýstrııasy, avtokólik qurastyrý, aýyl sharýashylyǵy mashınalaryn jasaý jáne basqa da salalar boıynsha 130-dan astam kásiporynnyń ónimderi qoıylǵan.
Qazaqstan ekspozısııasyn kórýge kelgender tyńaıtqysh, alıýmınıı jáne zergerlik buıymdar, medısınalyq jabdyqtar, kosmos apparatynyń maketteri, kompıýterler, telekommýnıkasııalyq qondyrǵylar, ushqyshsyz basqarylatyn ushý apparattary, qurylys materıaldary, kıim-keshek, dári-dármekter, medısınalyq buıymdar jáne basqa da kóptegen otandyq ónim túrlerimen tanysty.
Kórme qonaqtary otandyq BARK Technology kompanııasy ázirlegen jıiligi 20-320 Gs vıbroakýstıkalyq tolqyn arqyly ókpeni emdeýge arnalǵan VibroLUNG biregeı qazaqstandyq medısınalyq apparatyna erekshe nazar aýdardy. Búginde bul apparatty Qazaqstannyń, Reseıdiń, О́zbekstannyń, Belarýstiń, Panamanyń, Birikken Arab Ámirlikteriniń jáne Sıngapýrdyń jetekshi klınıkalary satyp alǵan.
Kórmege otandyq ónim óndirýshiler shyǵarǵan 40-tan astam kólik, onyń ishinde 20 jeńil avtokólik, 10 aýyl sharýashylyǵy tehnıkasy, 7 arnaýly tehnıka, 2 avtobýs jáne brondy áskerı mashınalar qoıyldy.
Memleket basshysy Qasym-Jomart Toqaev ulttyq pavılon ekspozısııalarymen tanysý barysynda Tájikstan Prezıdenti Emomalı Rahmonǵa Qazaqstannyń atynan otandyq QazTechna kompanııasy qurastyrǵan mektep oqýshylaryna arnalǵan avtobýs jáne VibroLUNG medısınalyq jabdyǵynyń 3 jıyntyǵyn syıǵa tartty.
