Keshtiń ekinshi bóliminde teatrdyń bas baletmeısteri Mýkaram Avahrıdiń elimizdiń tanymal kompozıtory Karına Abdýllınanyń mýzykasy men lıbrettosyna qoıǵan avtorlyq «Taǵdyr bultarystary» baleti usynylady.
– XI teatr maýsymynyń ashylý saltanatyna sanaýly kún qaldy. Teatrda qyzý daıyndyq júrip jatyr. Rólderge jańa ártister qosylyp, premeralyq jáne kórermen kózaıymyna aınalǵan spektakldermen jumys atqaryp otyrmyz. Jańa maýsymnyń ashylý saltanaty biz úshin óte jaýapty sát. Súıikti kórermenimizben qaýyshar kúndi asyǵa kútip otyrǵan jaıymyz bar, dep atap ótti teatrdyń kórkemdik jetekshisi Nurlan Kanetov.
«Astana balet» teatrynyń qyrkúıek aıynda kórermenine usynar tartýy erek. San alýan sulýlyqtyń basyn bir sahnada toǵystyrǵan ǵajaıyp meken 22 qyrkúıekte ótken maýsymnyń úzdik premeralary – Aınur Ábilǵazınanyń Gýstav Maler mýzykasyna qoıǵan, «Astana balet» teatry sımfonııalyq orkestriniń súıemeldeýimen ótetin «Soli Deo Gloria» jáne Lıza Djerrardtyń mýzykasyna Oljas Mahanbetálıev qoıǵan «Nine» bir aktili baletterin usynady.
Al 29 jáne 30 qyrkúıek kúnderi Qazaqstannyń eńbek sińirgen qaıratkeri Aıgúl Tátıdiń bılerimen órnektelgen «Uly dala murasy» dıvertısmenti kórsetiledi. Qazaqtyń bolmysyn sýretteıtin etnografııalyq sıpattaǵy ári beınelik qatary tereń mınıatıýralarda Uly dalanyń baı mádenıeti sýrettelgen. Aıtýly balet baǵdarlamasyn tamashalaı otyryp, qazaq horeografııa óneriniń jetken bıigin kórip, etnografııalyq elementter men bı dástúrin, zamanaýı baletmeısterlik sheshimderdi úılestire bilgen týyndylarǵa baǵa berýge bolady. Sondaı-aq teatr ujymy daıyndap jatqan jańa maýsymnyń jańa jobalary da jan jadyratady.
– Jańa maýsymda birneshe premera josparlap otyrmyz. Atap aıtsaq, 6-7 qazanda «Ot qyz» ertegi baletin usynbaqshymyz. Bul spektakl – daryndy avtorlardyń jumyla atqarǵan eńbeginiń jemisi. Lıbretto avtory Baqyt Qaıyrbekov mádenıetimizdiń qyr-syryn ashyp, ózindik ereksheligin áıgilep berse, ánshi Karına Abdýllına shyǵarǵan mýzyka spektaklge jan bitirip, túrli emosııaǵa bóleıdi. Al horeograf Mýkaram Avahrıdiń jańashyl, batyl ıdeıalary kórermen sanasyna qozǵaý salyp, kókeıinen shyǵady degen úmittemiz. Teatrymyzdyń árbir jańa maýsymy teatr álemine shomyp, bıik ónerdiń ǵajaıyp álemine saıahat jasaýmen para-par dúnıe, dep balet ordasynyń jańalyqtaryna teatr dırektory Aleksandr Sovostıanov jan-jaqty toqtaldy.
Mádenıet jáne aqparat mınıstrliginiń qoldaýymen sahnaǵa jol tartatyn qaı spektakldiń de kórermenine syılar rýhanı lázzaty mol.
