Foto: https://parlam.kz/
Rınat Zaıytovtyń «Elimizde ǵalamtor arqyly, basqa da resýrstarda jasalyp jatqan alaıaqtyq faktilerin júzege asyrýshylardyń 80%-y – namaz oqıtyn qaýym. О́tirik dese, kelip betime bassyn. Tipti bazarǵa baryńyz, basqa qoǵamdyq oryndarda da sondaı, saqalyn sıpap, aýzynda Allasy aıtylǵanymen shyntaýaıtynda adam aldap jatyr» dep aıtqan pikiriniń úzindisi qyzý talqylanyp jatyr.
«Keıingi eki kúnde maǵan qaraı ekpindi aqparattyq jáne psıhologııalyq shabýyl bastaldy. Ony ózim de kútkenmin. Sebebi, oǵan etim úırengen. Mundaı shabýyldar maǵan 2008, 2011, 2019-ynshy jyldary da jasalǵan. Jasyrmaımyn, ońaı emes. Biraq shydaýǵa týra keledi. Endi sizderge bul tehnologııa qalaı jasaqtalatynyn túsindirýge tyrysaıyn. Mysaly osy jolǵy shabýyldyń taqyryby meniń namaz oqyp júrip alaıaqtyq jasaıtyn adamdar jaıly aıtqan sózimdi alǵa tartyp, sol arqyly qoǵamdy maǵan qarsy qoımaq. Maqsaty belgili. Birinshisi - meni qorqytý, ekinshisi - meniń jeke basyma qastandyq jasalsa, osy sebepten eken degizý. Sóz joq, aqyldy júris. Ekeýiniń bireýine jetkenshe olardyń toqtamaıtynyn da bilemin. Táýekel. Mańdaıǵa jazǵanyn kóremiz», dedi R.Zaıytov.
Májilis depýtaty eshkimnen qorqyp qashpaıtynyn, aıtqan pikirinen aınymaıtynyn, bar armany eldiń gúldenip kórkeıýi ekenin jazdy.
«Eshbir toptyń aldynda tizerlep keshirim suramaımyn! О́ıtkeni oǵan sebep kórip turǵan joqpyn. Áleýmettik jeli shýlady eken dep, dirildeıtin qorqaqtaryń men emes. Alǵa qoıǵan naqty maqsatym men josparym bar. Sol jumystardy bitirýim kerek. Májilis minberinen halyqqa bergen antym bar. Berilgen merzim - bes jyl. Sol bes jylymdy halyqtyń múddesin qorǵaýǵa arnaımyn. Basqasy bir jaratqannyń quzyrynda.
Túsinetin shyǵarsyzdar dep oılaımyn», dep jazdy depýtat.
Kúndelikti jumysqa bir ózi eshbir oqqaǵarsyz jaıaý baryp keletin aqyn qandaı qysym kórsetilse de qoryqpaıtynyn málimdedi.
