О́ńirlik tabıǵı resýrstar jáne tabıǵatty paıdalanýdy retteý basqarma basshysynyń orynbasary Bolysbek Sháripbekovtiń aıtýynsha, óńirdiń barlyq aýdanynda ótken senbilikte ár mekeme ózine júktelgen aımaqta tazalyq jumystaryn júrgizse, memlekettik qyzmetshiler men derbes bólimder «Túrkistan-Kentaý» tas joly boıyn aram shópterden tazartty.
Sondaı-aq dúnıejúzilik tazalyq kúnine oraı oblysta «World Cleanup Day 2023» jyl saıynǵy ekologııalyq aksııa uıymdastyryldy. Qorshaǵan ortany tazalaı otyryp, tabıǵatqa janashyrlyq tanytý jáne ár adam boıyndaǵy ekologııalyq jaýapkershilikti qalyptastyrýdy maqsat tutqan senbilikke oblys aýmaǵyndaǵy barlyq aýmaqtyq departamentter men basqarmalar, aýdan, qala ákimdikteri, bıýdjettik mekemeler men turǵyndar, jalpy 13 myńǵa jýyq adam atsalysty. Al Jetisaı aýdanynda júrgizilgen tazalyq jumystaryna 5 myńǵa jýyq halyq qatysqan. Árbir mekeme men bólimderge arnaıy bekitilgen ýchaskelerde beı-bereket jatqan qoqys oryndary, «Jetisaı-Atakent» tas joly boıynda ornalasqan «Dostyq» magıstraldy kanalynyń K-26 arnasynyń mańy, aýdannyń kireberisi qatty turmystyq qaldyqtardan tazartyldy.
«Kez kelgen aýdan, qalanyń tazalyq kórsetkishi jergilikti halyqtyń mádenı deńgeıin kórsetedi. Turǵyndardyń jaqsy turmysy úshin birqatar ıgi is atqarylyp keledi. Kósheler keńeıtilip, túngi jaryqshamdar ornatylyp jatyr. Aryqtar tazalanyp, kóshet egý jumystary da kezeń-kezeńimen júrgizilip jatyr. Bardy qadirleı otyryp, týǵan eline qurmetpen qarap, el-jurtyn jaqsy kóretin azamattardy aýdandy kórkeıtýge, abattandyrýǵa, elimizdegi eń taza aımaqtardyń biri bolýyna belsene atsalysýǵa jumyldyrý da úlken mańyzǵa ıe», deıdi Jetisaı aýdany ákimi apparatynyń basshysy Esen Aldanııazov.
Búginde aýdandarda tazalyq jumystaryn birqalypqa keltirý maqsatynda kóshe turǵyndary men shaǵyn aýdan bıleriniń, jergilikti ýchaskelik polısııa qyzmetkerleriniń qatysýymen túsindirý jumystary udaıy júrgizilip keledi.
Túrkistan oblysy
