Svetlana Jaqypova Májilis depýtaty Rınat Zaıytovtyń Qazaqstanda eń tómengi jalaqy mólsherin 300 myń teńgege deıin kóterý týraly usynysyna túsinikteme berdi,
Mınıstrdiń aıtýynsha, eń tómengi jalaqynyń bulaısha ósýi shaǵyn jáne orta bıznes ókilderine keri áserin tıgizedi.
«Eń tómengi mólsherdi 300 myń teńge qylyp qoısaq, ony orta jáne shaǵyn bıznes kótere almaıdy. Olar jalaqy tóleýi kerek, zeınetaqy qory bar degendeı. Bul - qaýipti. Iá, popýlıstik turǵyda bul sheshimge bara alamyz. Bárine jar salyp osynsha kóterdik dep aıtýǵa bolady, alaıda shyn máninde, eshkim durys jumys isteı almaı qalady», dedi mınıstr.
«Eń tómengi jalaqynyń mólsheri 45 myń teńgeden bastalyp, 85 myńǵa jetip otyr. Jumys berýshi bul tólemnen tómen tólemeýi kerek. Mysaly 21 kún jumys istep 80 myń teńge tólese, jumysshy sotqa aryzdanyp, quqyǵyn qorǵaı alady», dedi vedomstvo basshysy.
Aıta keteıik, 1 qyrkúıekte Prezıdent Qasym-Jomart Toqaev 2024 jyldyń 1 qańtarynan bastap eń tómengi jalaqyny 85 myń teńgege deıin kóterýdi tapsyrǵan edi.
