Foto: Abaı oblysy ákimdigi
Aıta ketsek, Prezıdent Jarlyǵymen qurylǵan úsh oblysta ardagerler uıymynyń fılıaldary qurylyp, buǵan deıin eki oblys ortalyǵynda – Qonaev jáne Jezqazǵan qalalarynda arnaıy ardagerler ortalyǵy ǵımaraty ashylǵan edi.
Májilis depýtaty osyndaı ortalyqtyń Semeı qalasynan ashylýyna arnaıy ǵımarat bólip, kómek kórsetkeni úshin oblys ákimine rızashylyǵyn bildirdi.
B.Izmuhambetov is-sapar barysynda Abaı, Shákárim, Muhtar Áýezov eskertkishterine gúl shoqtaryn qoıyp, tarıhı-mádenı oryndardy aralady. Munan soń oblystyq ardagerler keńesi ortalyǵynyń ashylý saltanatyna qatysyp, oblys ardagerlerimen júzdesti.
Ardagerler ortalyǵynyń ashylýyndaǵy sóılegen sózinde Baqtyqoja Izmuhambetov: «Aldymen qazaqqa Abaı men Shákárimdi jáne Muhtar Áýezovti tartý etken ulylar mekeniniń burynǵy mártebesin qaıtaryp, Abaı oblysy bolyp qaıta qurylýymen quttyqtaımyn», dedi.
Májilis depýtaty ardagerlerge memleket tarapynan barlyq jaǵdaı jasalyp jatqanyn atap ótti.
«Eldik isterde aǵa býynǵa túser júk salmaqty. Ardagerlerimizden eldiń tynyshtyǵy men yntymaǵy jolynda, Memleket basshysynyń bastamalaryn turǵyndarǵa túsindirýde qoǵamdyq jumystarǵa belsendi aralasýyn suraımyn. Qazirgi ǵalamtordyń damyǵan ýaqytynda, teris pıǵyldaǵy aǵymdar kóbeıip ketti. Osy jaǵynan saq bolyp, jastarǵa durys baǵyt-baǵdar kórsetýimiz kerek. AQSh-ta ótken BUU Bas Assambleıasynyń 78-sessııasyndaǵy jalpy debatta, ıaǵnı, eń bıik halyqaralyq minberde sóz alǵan Prezıdentimiz kótergen usynystarymen óziniń myqty dıplomat ekenin álem elderiniń aldynda taǵy bir dáleldedi. Aldymyzda ardagerlerdiń aralasýyn qajet etetin máseleler kóp. Qoǵamda bolyp jatqan ózgeristerdi eldiń arasynda túsindirip júrýimiz kerek», dedi Májilis depýtaty, respýblıkalyq «Ardagerler uıymy» qoǵamdyq birlestiginiń tóraǵasy Baqtyqoja Izmuhambetov.
Kezdesý sońynda ardagerlerdi halyqaralyq qarttar kúnimen quttyqtap, qoǵamdyq jumystarǵa belsendi aralasyp júrgen biraz ardagerlerge «Ardagerler uıymynyń» «Qurmetti ardager» tósbelgisi men «Qurmet gramotalaryn» tabystady.
