– Bul kópten oıymyzda júrgen joba edi. Bul sapardyń negizgi maqsaty – áıgili ánshi Muhıt sal júrip ótken jerlermen júre otyryp, el ishindegi kónekóz qarttardan, ólketanýshy azamattardan Muhıt sal týraly qundy derek jınaý. Barǵan jerimizde sol óńirdiń zııaly qaýymymen kezdesip, ánshiniń ónerimen, ánderiniń shyǵý tarıhymen tanystyryp, dáris-konsertimizdi usynamyz. Sonymen qatar sol ólkedegi Muhıt mektebiniń ánshilerimen tanysyp, tájirıbe almasý oıymyzda bar, – deıdi Muhıt Meralıev atyndaǵy qoǵamdyq qordyń tóraǵasy Saǵadat Rahmetjanov.
Ekspedısııa eki apta ishinde Atyraý, Mańǵystaý, Aqtóbe, Qyzylorda, Túrkistan, Qaraǵandy oblystarynda bolyp, sapardyń núktesin 15 qazan kúni Astana qalasynda qoımaq. Top quramynda respýblıkalyq baıqaýlardyń júldegeri, jas ánshi Nuraly Aıtýǵanov, jergilikti «Aqjaiyq» telearnasynyń operatory bar. Sapardyń nátıjesinde derekti fılm, jınaq kitap shyǵarý josparlanǵan.
«Sal Muhıt – batysqazaqstandyq án mektebin qalyptastyrǵan áıgili ánshi ekenin bilemiz ǵoı. Sondyqtan elimizdiń batys oblystaryn túgel aralaımyz. Al Qaraǵandy oblysyndaǵy Qarqaraly óńirin kirgizgen sebebimiz – Muhıt babamyz kezinde osy jerde ótken Qoıandy jármeńkesine de qatysyp, Aqan seri, Birjan saldarmen kezdesip, birge án salǵan eken» deıdi ánshi.
О́nerpazdar áýeli Batys Qazaqstan oblysynyń Qaratóbe aýdany Saraljyn aýyldyq okrýginde jatqan Muhıt Meráliulynyń kesenesine zııarat etip, úlken saparǵa attanyp ta ketti. Saǵadat Rahmetjanov osy saparǵa qoldaý bildirgen oblys basshylaryna rahmet aıtady.
Batys Qazaqstan oblysy
