Veterınarlyq uıymdardyń jumysyn talapqa saı júrgizý úshin jergilikti bılik qoldan kelgenshe qoldaý kórsetip otyr. О́ńir basshysy Erbol Qarashókeevtiń aıtýynsha, bul jumystar úzdiksiz júrgizilmek. Máselen, taıaýda ǵana sala mamandaryna jergilikti bıýdjet esebinen arnaıy jabdyqtalǵan on birdeı «ÝAZ» avtokóligi tabystaldy.
О́ńir basshysy veterınarııa uıymdarynyń jumysyn jetildirýge aıryqsha nazar aýdaryp otyrǵany belgili. Qazirgi kezde oblystaǵy mekemelerdi ortalyqtandyrý jumystary myqtap qolǵa alynǵan. Bul jumys tolyǵymen aıaqtalǵan kezde sala mamandarynyń áleýmettik jaǵdaıy arta túsedi. Oblys ákiminiń aıtýynsha, eńbegine adal qyzmetkerlerdiń jalaqysy kóbeımek.
«Prezıdentimiz Qasym-Jomart Toqaev 2021 jyly Qazaqstan halqyna arnaǵan Joldaýynda veterınarııa salasyn reformalaýǵa aıryqsha den qoıǵany málim. Ortalyq pen óńirlerdiń naqty mindetterin aıqyndap, salany tolyqtaı sıfrlandyrý, maman daıarlaý, jalaqyny arttyrý sekildi mańyzdy mindetterdi de júktedi.
Qazirgi kezde óńirimizde Prezıdent tapsyrmasyn iske asyrý boıynsha naqty jumystar atqarylyp jatqany daýsyz. Oblystaǵy veterınarlyq uıymdardy ortalyqtandyrý jumysy jolǵa qoıyla bastady. Endi aýdandardaǵy veterınarlyq stansalar ózderine júktelgen mindetterdi ǵana júzege asyrady. Al qarjylyq-sharýashylyq máselesimen oblystyq deńgeıde qurylatyn kásiporyn aınalysady. Únemdelgen qarajat esebinen eldi mekenderdegi mal dárigerleriniń jalaqysyn eki esege deıin arttyrýǵa múmkindik týmaq», dedi óńir basshysy sala mamandaryna sý jańa avtokólikterdi tabystaý rásiminde.
О́ńir basshysy aldaǵy ýaqytta aýyldardaǵy veterınarlyq qyzmet kórsetetin mal dárigerleriniń jaǵdaıyn baqylaýǵa almaqqa bel býyp otyr. Sondaı-aq ol veterınarlyq stansalardyń materıaldyq-tehnıkalyq bazasyn nyǵaıtýǵa aıryqsha kóńil bólmek. Ásirese veterınarlyq pýnktterdi ýaqyt talabyna saı ǵımarattarmen, emdeý alańdarymen qamtamasyz etý jumystaryna basymdyq beriledi.
Taraz
