Foto: senate_kz
«Prezıdent Qasym-Jomart Kemeluly Toqaev Ulttyq quryltaıdyń Túrkistan tórinde ótken otyrysynda júıeli ıdeologııalyq jumystyń negizgi baǵyttaryn belgilep berdi. Bul baǵytta tarıhı sanany jańǵyrtý, mádenı murany nasıhattaý, óskeleń urpaqty tárbıeleý máselesine basa mán berildi», degen M.Áshimbaev Memleket basshysynyń bastamasymen mádenı murany jáne ulttyq qundylyqtardy dáripteý baǵytynda da aýqymdy reformalar iske asyrylyp jatqanyn aıtty.
Senat Tóraǵasy ulttyq qundylyqtar, eń aldymen, tilimizge, tarıhymyzǵa, mádenıetimizge, dástúrimizge jáne dinimizge taban tireıtinin jetkizdi.
«Tarıhı sanany qalyptastyrý mańyzdy mindetterdiń biri. Sonyń aıasynda Memleket basshysynyń tapsyrmasymen Senat asharshylyq taqyryby boıynsha biraz arhıv qujattaryn jarııalady. Búginge deıin jeti tom jınaq ázirlendi. Bul jumys aldaǵy ýaqytta da jalǵasady. Halqymyz ejelden din men dástúrdi sabaqtastyra bilgen. Kóshpendi órkenıetke tán oı erkindigi, ashyqtyq, toleranttylyq ártúrli radıkaldy kózqarastarǵa boı urmaýǵa múmkindik berdi. Biz din máselesinde ata-babamyz qalyptastyryp ketken jáne ýaqyttyń synynan ótken osy rýhanı jolymyzdan jańylmaýymyz kerek. Ultymyzdyń ulylary Abaı da, Shákárim de, Alash qaıratkerleri de osyǵan úndegen», dedi Senat Tóraǵasy.
Otyrys barysynda qatysýshylar qozǵalǵan máselege qatysty pikir bildirip, aldaǵy ýaqytta bul baǵytta birlesip jumys isteýge múddeli ekenderin jetkizdi. Sondaı-aq is-sharada ulttyq qundylyqtardy oqytý baǵdarlamalary, sıfrlyq kommýnıkasııanyń zamanaýı formattary jáne basqa da bastamalar arqyly dáripteý jóninde tyń ıdeıalar aıtyldy.
Dıalog alańynda Senat jáne Májilis depýtattarymen qatar elimizdiń eńbek sińirgen sáýletshisi, memlekettik eltańbanyń avtory Jandarbek Málibekov, jazýshy, qoǵam qaıratkeri Jabal Erǵalıev, «Qazaq gazetteri» JShS-nyń bas dırektory, UǴA akademıgi, alashtanýshy Dıhan Qamzabek, jazýshy, dramatýrg Roza Muqanova, mádenıet qaıratkeri Qanat Aıtbaev, halyqaralyq dárejedegi sport sheberi, «Qazaq boxing» mektebiniń jattyqtyrýshysy Muhıt Amantaev, «Unknownkazak» jobasynyń avtory, bloger Dıas Kamerıdanov jáne taǵy basqa sarapshylar qatysyp, pikirlerin aıtty.
