Uly dala patshaıymdaryn kilem betine sýrettegen gıperrealıst sýretshi Ásel Sabyrjanqyzy shyǵarmashylyqta túrli tehnıkany qoldanyp, tájirıbe jasaǵanǵa qumar. Onyń buǵan deıingi týyndylary da qoǵamnyń ystyq yqylasyna bólengen edi. Atap aıtsaq, Baýyrjan Momyshuly, Batyrhan Shúkenov, Gennadıı Golovkın syndy el maqtanyshtarynyń portretteri sátti shyqqan.
Ásel keıingi ýaqytta gıperrealızm janrynda sheberligin shyńdap keledi. Gıperrealızm – nysandy fotorealızasııaǵa negizdelgen sýret salý men músindeýdiń stıli. Sýretshiniń osy baǵytta alty qaryndashpen bir ýaqytta alty adamnyń portretin salýy kórermenin kezekti ret eleń etkizdi.
«On jyldan asa keskindeme boıynsha bilim aldym. Maǵan gıperrealızm baǵyty boıynsha sýret salý qatty unaıdy. Dál osy baǵytty elimizde alǵashqylardyń biri bolyp damytqym keldi, óıtkeni tikeleı osy janrda sýret salatyn maman tapshy. Sondyqtan da bul jolda óte uzaq izdendim. Gıperrealızm baǵytynda kóptegen sýret sala bastadym. Sodan keıin tapsyrystar da túsetin boldy. 2021 jyldan bastap áleýmettik jelide belsendi túrde blog júrgizdim. Ártúrli tehnıkamen sýret salǵanymdy vıdeoǵa túsirip, jarııalap otyrdym. О́z blogimde mashınanyń kapotyna da, qolymmen, aıaqtarymmen de sýret saldym, sonymen qatar 3 jáne 6 portretti bir ýaqytta salyp, túrli tájirıbe jasadym. Osylaısha, aýdıtorııam kúnnen-kúnge kóbeıip, ónerge qyzyǵatyn adamdardyń sany artty», deıdi Ásel Sabyrjanqyzy.
Atalǵan kórme negizinen dala áıeliniń batyl beınesin kórsetý maqsatynda uıymdastyrylǵan. Ásirese qoǵamǵa beımálim áıelderdiń beınelerine aıryqsha mán berilgen.
«Tomırısti, Álııa Moldaǵulovany bári biledi. Biraq bizde umytylǵan batyr qyzdarymyz qanshama? Mysaly, Gaýhar batyrdy, Aıbıke batyrdy, Súıinbıke men Bopaıdy kóp adam bilmeıdi. Men jastarǵa qazaqtyń umyt bolǵan batyr qyzdaryn, tarıhymyzdaǵy myqty áıel obrazdaryn kórsetkim keldi», deıdi sýretshi.
Qaz-qatar tizilgen qazaq qyzdarynyń beınesi bir sátte-aq rýhyńdy oıatyp, ata-babadan qalǵan ishtegi bir batyldyǵyńdy tiriltedi. Tipti týyndylardyń shynaıy shyqqany sonshalyq, kózderindegi qaırat pen jiger óńmenińnen ótedi. Portretterdiń bárine ortaq kúsh – ulttyq rýh. Ulan-ǵaıyr darqan dalanyń bar keńdigin jıǵan obrazdar ulttyń urany sekildi jan terbetedi. Mundaı rýhty oıatatyn týyndylardyń el ishine taralyp, jas urpaqty tárbıelep jatqany da úlken olja emes pe? Sýretshiniń dittegen maqsaty da osy.
Jemisti jumystyń arǵy jaǵynda árqashan tynymsyz eńbek pen úzdiksiz izdenis jatatyny aıqyn. Sýretshiniń tyń stıli, ózindik qoltańbasy da sonyń dáleli. Ol buǵan deıin kóptegen respýblıkalyq jáne halyqaralyq baıqaýlarda júldeli bolyp, shyńdalyp keledi. 2012 jyly «Ernst & Young» kompanııasy ótkizgen konkýrsqa qatysyp, eki kartınasy júldeli birinshi jáne ekinshi oryn alǵany esimizde. Búginde atalǵan kartınalar kompanııanyń keńsesinde ilýli tur.
Iá, Áseldiń búginde ataǵy Arqadan Atyraýǵa deıin jaıylǵan. Áleýmettik jelini de osy maqsatta tıimdi paıdalanyp otyr. Qazir jas sýretshiniń TikTok-ta – 320 myń, Instagram-da 113 myń adamdyq aýdıtorııasy bar. Bul – úlken nátıje. О́z týyndylaryn zamannyń aǵymyna saı kórermenge usynyp, qoshemetine ıe bolý da óner emes pe!
