Foto: parlam.kz
«Bıyl shilde aıynda halyqaralyq qatynastar, qorǵanys jáne qaýipsizdik komıtetiniń músheleri, birneshe depýtat Jetisý men Jambyl oblystaryndaǵy shekara áskerı bólimderinde bolyp, qaýipsizdik máselesin ishteı zerdeledik.
Birqatar áskerı bólimderde qajetti jaǵdaı jasalmaǵan. Aýyzsý, jylý, jaryq berý, kadr sondaı-aq áleýmettik qorǵaý máselesi de bar. Sonymen birge shekarany qorǵaýdyń tehnıkalyq jáne baılanys quraldarynyń eskirýi, ınfraqurylymnyń tozýy qatty alańdatady. Máselen, búginde shekara zastavalarynyń keıbiri apattyq jaǵdaıda tur. 1950-1960 jyldary salynǵan, ábden tozyǵy jetken eski ǵımaratta ornalasqan. Shekara shebin bekemdeý maqsatynda 2006-2010 jyldarǵa arnalǵan memlekettik baǵdarlama qabyldanǵan edi. Bul baǵdarlama aıasynda 68 nysannyń qurylysy josparlanyp, qajetti qarajat bólingen. Alaıda 15-iniń qurylysy aıaqsyz qalǵan. 2017 jyly osy 15 nysannyń qurylysyna aýdıtorlyq tekseris júrgizilip, nátıjesinde olardyń úsheýi apattyq dep tanylsa, 9 nysannyń qurylysy talapqa saı bolmaı shyqqan. Mundaı kemshilikterdi Soltústik Qazaqstan oblysyndaǵy zastavalardy aralaǵanda da kórdik. Qurylys kompanııalary jumysty aıaqtamaı jatyp qurylys materıaldary qymbattady degen jeleýmen smetalyq qunynan qosymsha aqsha suraıdy, qurylysty sozbalańǵa salady. Osyndaı merdiger kompanııalardyń kesirinen zastavalardaǵy máseleniń kúrmeýi sheshilmeıdi. 2024-2028 jyldarǵa arnalǵan shekara qaýpsizdiginiń keshendi jospary ázirlengen. Sonymen qatar memlekettik shekara ınfraqurylymyn damytý máseleleri boıynsha jol kartasy bekitildi. Bul sharýany tııanaqty atqarýǵa 700 mıllıard teńge qajet. Alaıda Májiliste qaralyp jatqan bıýdjette shekara máselesin sheshýge tıisti qarajat engizilmegen», dedi B.Kerimbek.
Májilis depýtaty álemdegi geosaıası jaǵdaıdy eskere otyryp, eldiń egemendigin, aýmaqtyń tutastyǵyn, ulttyń qaýipsizdigin qamtamasyz etý maqsatynda Úkimetke birneshe usynys aıtty.
B.Kerimbek 2020 jylǵa deıingi qarýly kúshteri tujyrymdamasynyń oryndalýyn qamtamasyz etý, atap aıtqanda: shekara qyzmetinde bastapqy serjanttan generalǵa deıingi áskerı kadrlardy daıarlaý, sheteldiń jetekshi joǵary oqý oryndarynda kýrstyq daıyndyqtan ótý, áskerı qyzmetshilerdiń áleýmettik paketin jetildirý, shekara ınfraqurylymyn jańǵyrtýǵa baǵyttalǵan arnaıy is-sharalar qabyldaý, shekara qyzmetin jáne qorǵanys salasyn qarjylandyrýdy ishki jalpy ónimniń kem degende bir paıyzyna jetkizýdi zańmen bekitýdi usyndy.
