Baıqaýdyń saltanatty ashylýynda quttyqtaý sóz sóılegen qala ákiminiń birinshi orynbasary Qýanysh Asylov úmitkerlerge sáttilik tiledi. Baıqaýdyń ótýine muryndyq bolǵan – qalalyq ishki saıasat jáne jastar isteri basqarmasy men jastar resýrstyq ortalyǵy. Sonymen tartysty músháırada Serǵazy Qaıyrboldy III oryn, Jadyra Baıbulanova II oryn, Ulytaý oblysynan kelgen jas aqyn Aızada Rahymjan I oryn alyp, «Kúmis qalam – 2023» júldesiniń ıegeri atandy.
Jazba aqyndar músháırasynyń izin ala «Táýelsizdik – babalar amanaty» taqyrybynda jas aıtysker aqyndar arasynda «Kúmis dombyra» respýblıkalyq konkýrsy ótkizildi. Baıqaýda Qazaqstannyń ár túkpirinen kelgen 16 aıtysker aqyn baq synady. Aıtys óneriniń maıtalmandary, mádenıettiń eńbek sińirgen qaıratkerleri konkýrsqa qazylyq etti. Bir-birimen sóz qaǵystyrǵan, tapqyr oılarmen qarsylasyn tuqyrtyp, jalyndy jyr shýmaqtarymen delebeni qozdyrǵan jas aqyndar aıtysy jınalǵan kópshiliktiń rýhanııatqa sýsaǵan shólin bir qandyryp tastady.
Qarataý dástúrli óner mektebindegi aıtys synybynyń jetekshisi, osy ónerdiń beldi ókilderiniń biri Qajymuqan Abzal Táýelsizdiktiń arqasynda tól ónerimiz nasıhattalyp, qoldaý tapqanyn aıtty. Aqyn sondaı-aq «Kúmis dombyra» baıqaýy jyl saıyn bola berse eken degen tilegin jetkizdi. Baıqaý respýblıkalyq bolsa da, qatarynan úsh jyl Shymqalada ótýi megapolıstiń tól ónerge degen janarshylyǵyn baıqatsa kerek degen oıyn qosa ketti.
Respýblıka kúni merekesin, Táýelsizdikti arqaý etken aıtysker jas aqyndardyń baıqaýynyń qorytyndysyna kelsek, «Kúmis dombyranyń» bas júldesin shymkenttik Aıan Nııazbek enshiledi. Odan bólek, Erdáýlet Ybyraı men Nurdáýlet О́mirbek III oryn, Jambyl oblysynyń aqyny Muhtar Qonarbaı men túrkistandyq Ahmetrasýl Baıanbaı II oryn, al qasıetti Baıanaýyl jerinen kelgen kelgen jas aqyn Máres Baıron I oryn ıelendi.
«Kúmis dombyranyń» bas júlde ıegeri Qarataý dástúrli óner mektebiniń ustazy Aıan Nııazbek jýrnalısterge bergen suhbatynda jas aqyndar aıtysynda osymen úshinshi jyl qatarynan baq synap júrgenin jetkizdi. Jarystyń birinshi kezeńinde astanalyq shaıyr Erdáýlet Ybyraevqa qarsylas bolsa, ekinshi kezeńde túrkistandyq aqyn Ahmetrasýl Baıanbaımen talasqa túsken. Ol aıtys ónerine jastardyń qyzyǵyp kele jatqanyn aıtyp, qýanyp otyr. Zal toly jastardy kórip solardyń qoǵamdaǵy máselesin qozǵaǵanyn aıtty.
О́ner dodasynan keıin oryn alǵan júldegerlerge Shymkent qalasy ákiminiń birinshi orynbasary Qýanysh Asylov arnaıy syılyqtardy tartý etti.
ShYMKENT
