Dástúrli Frankfýrt kórmesi sheteldegi qandastarymyz tól mádenıeti men ádebıetimen qaýyshatyn ıgi sharaǵa aınalǵan.
«Qazaqstan baspagerler, polıgrafıster jáne kitap taratýshylar» qaýymdastyǵy men «Nomad» mádenıet qorynyń halyqaralyq baılanystaryn úılestirýshi Baıan Qablashtyń aıtýynsha, kórme stendteriniń san alýandyǵyna qaramastan, elden jetken sálemmen qaýyshýǵa asyqqan qandastarymyzdyń qýanyshynda shek bolmady. Olardy qazaq tilinde jaryqqa shyqqan elimizdiń tarıhy, ádebıeti, tabıǵaty, balalar taqyrybyndaǵy kitaptar erekshe qyzyqtyrdy.
Bul joly Frankfýrt qalasyndaǵy Qazaqstannyń Bas konsýldyǵy «Qazaq ádebıeti men mádenıetiniń mańyzyna» arnalǵan ádebı kesh uıymdastyrdy.
Is-shara barysynda elimiz úshin tarıhı máni zor egemendiktiń tarıhy baıandaldy. Osy jyldardaǵy jetistikter, saıası reformalar el damýynyń keleshegin aıqyndasa, Qazaqstan men Germanııa arasyndaǵy mádenı ári ekonomıkalyq baılanys jyldan-jylǵa nyǵaıyp keledi.
Ádebı keshte «Batý men dostarynyń altyn tostaǵandy izdegeni» kitaby avtorlarynyń biri, mádenıettanýshy-jazýshy Zıra Naýryzbaımen kezdesý ádebı kesh qatysýshylary úshin tosynsyı boldy. Búginde shytyrman oqıǵaly týyndy Amazon-da birneshe reıtıngte kósh bastap tur. Zıra Naýryzbaı qandastarymyzǵa ana tilimizdiń qazirgi jaǵdaıy, ultymyzdyń mádenı murasyn saqtaı otyryp, jahanda árdaıym qazaq bolyp qalýdyń mańyzy jaıynda baıandap berdi.
Rýhanı keshte «Almaty kitap baspasy» «TopIQ.kz» elektrondyq oqýlyqtardyń sıfrlyq platformasymen, «Steppe&World Publishing», «Atamura», «Mazmundama» baspalarynyń ókilderi qazaq dıasporasy jáne shetelde oqyp jatqan stýdentterdi qazaq ádebıeti men mádenıetine qatysty týyndylarymen tanystyrdy.
ALMATY
