«Qurmetti Qasym-Jomart Kemeluly! Keshegi kúnderi atamyz «Qarnymnyń ashqanyna emes, qadirimniń qashqanyna nalımyn» dep aıtqan eken. Minekeı, sony siz eskerip, qalam ustaǵan biz sııaqty bir top jazýshynyń qadirin kóterip otyrsyz. Sondyqtan da sizge degen alǵysymyz - alabóten!
Osydan birneshe kún buryn siz Qytaıda qytaısha sóılep, búkil qytaıdy tań qaldyryp edińiz. Al endigi jerde siz basqaryp otyrǵan Qazaqstan búkil álemdi tań qaldyratyn kúnge de jetkeımiz!», dedi Samǵul Elýbaı marapattaý rásimi barysynda.
Egemen.kz saıtynyń tilshisine bergen shaǵyn suhbatynda Smaǵul Elýbaı keńes odaǵy ókimeti kezeńindegi jazýshylarǵa bergen qalamaqy men qazirgi qalamaqyny salystyryp, óziniń pikirin bildirdi.
- «Halyq jazýshysy» degen marapatqa keletin bolsaq, talantty jazýshylar Tólen Ábdik, Beksultan Nurjeke, Sofy Smataev, Ahmetjan Ashırov, Lıýbov Shashkova qaryndasymyzǵa berildi. Bul jerde Quryltaı, Jazýshylar odaǵy, jáne ózge de Qazaqstandaǵy bedeldi uıymdar usynǵan kandıdattar boldy. Jazýshylarǵa keletin bolsaq, baǵana atap ótkendeı «Qarnymnyń ashqanyna emes, qadirimniń qashqanyna nalımyn» degen uǵym týra osy jazýshylardyń basynda bar jaǵdaı. О́ıtkeni, biz keńes odaǵy qulaǵannan keıin bórkimizdi aspanǵa laqtyryp, ólgenimiz tirilgendeı bolyp, óshkenimiz janǵandaı bolyp qýandyq. Biraq sol sovet ókimeti qulaǵannan keıin qatty qýanǵan jáne eldiń sózi bolǵan jazýshylar taıaq jedi. Olar qalamaqy degendi umytty, biz de umyttyq. Qazir qalamaqy beremiz dese biz tań qalamyz. Minekeı, osyndaı jaǵdaıda jazýshynyń qadiri qalaı bolsyn. Tipti halyqtyń aldyna turmaq, óziniń úıinde qadiri bolmaıdy. Úıge tabys alyp kelmeıtin otaǵasynyń qadiri eshqashan, esh jerde bolǵan emes. Jazýshylardyń adal tabysyna adal qalamaqy tóleý sovet zamanynda óte úlken dárejede boldy. Mysaly, bizdiń jasymyzǵa kelgen jazýshylar 4 tomdyq tańdamaly shyǵarma shyǵaratyn bolsa, ómiriniń sońǵy asýlaryna deıin esepteseń on páter satyp alatyndaı qalamaqyǵa ıe bolǵan eken. Ol nárseni kózimiz kórdi ǵoı. Al endi sol qyrýar qalamaqy búgingi qalamgerlerdiń kózinen bulbul ushty dep aıtýǵa bolady», dep bólisti Smaǵul Elýbaı.
