Foto: N.Baıbýlın
Qytaıdyń Hanchjoý qalasynda ótken IV jazǵy Azııa para oıyndaryndaryn bochchadan Qazaqstan quramasy jalpykomandalyq esepte segizinshi orynǵa taban tiregen bolatyn.
Máýlen Áshimbaev bochchashylardyń alǵash ret Azııa para oıyndaryna qatysqanyna qaramastan iri dodada laıyqty sheberlik tanytqanyna alǵysyn aıtty. Qazaqstan quramasy Iran, Koreıa, Gonkong, Taıland, Japonııa syndy elderdiń atletterimen synǵa tústi.
«Jarys jolynda sizder tabandylyq pen tózimdilik tanyta bildińizder. Azııa para oıyndaryna qatysý arqyly mol tájirıbe jınap, otandyq bochcha tarıhyndaǵy jańa kezeńge jol ashtyńyzdar. Jeńis degenimiz – qıyndyqtar men kedergilerdi eńserip, óz maqsattaryńa qol jetkizý. Qytaıdaǵy saıysta qarsylastardyń tájirıbeli quramalar bolǵany belgili. Sondyqtan jalpykomandalyq esepte segizinshi oryn alýdyń ózi aıtarlyqtaı nátıje. Biz osy saıysta ózimizdiń áli de bolsa jetildiretin tustarymyzdy anyqtap aldyq. Aldaǵy ýaqytta sol baǵyttar boıynsha jumys isteımiz», dedi bochcha federasııasynyń prezıdenti.
Kezdesýde Máýlen Áshimbaev jetistikke toqmeıilsimeı kelesi saıystarda budan da joǵary nátıje kórsetý úshin jattyǵý jumystaryn júıeli túrde jalǵastyra berýdiń mańyzy zor ekenin, keler jyly da bási bıik jarystarǵa qatysý jospary túzilgenin aıtty.
«Federasııanyń josparyna sáıkes jeltoqsan aıynda bochchadan el Kýbogi sarapqa salynady. Kelesi jyly taǵy alty saıys ótkizý kózdelip otyr. Sondyqtan qarqynymyzdy báseńdetýge esh negiz joq. Prezıdentimiz Qasym-Jomart Kemeluly Toqaev elimizde sport salasyn damytý úshin túbegeıli ózgerister qajet ekenin aıtty. Bul rette negizgi baǵyttardyń biri basqarý sapasyn jaqsartý, sondaı-aq, Týrızm jáne sport mınıstrligi, Ulttyq olımpıadalyq komıtet jáne sport federasııalary arasyndaǵy jumys úılesimdiligin arttyrý ekeni sózsiz. Osyǵan baılanysty Qazaqstan bochcha federasııasy da jattyqtyrýshylar quramymen jumysty jetildiredi jáne oń nátıjelerge qol jetkizý jolynda basqa da sharalardy qabyldaıdy», dedi. Qytaıda ótken Azııa para oıyndarynda bochchadan baq synaǵan ulttyq qurama sapynda Meıirbek Orazbek, Qýanysh Asqarbekov, Itıana Shyńǵyshanova jáne Temirlan Altynsary dodaǵa qatysty.
