Tehnologııa jańalyqtyń jarshysyna aınalǵan tusta Ádilet mınıstrligi memlekettik qyzmet kórsetýdi sıfrlandyrý baǵytynda júıeli jumys atqaryp keledi. Bul bir jaǵynan jemqorlyq táýekelderin meılinshe azaıtady. Ekinshi ońtaıly tusy – azamattardyń ýaqytyn únemdeýine sep bolady. Búginde «eGov mobile» qosymshasynda mınıstrliktiń 29 memlekettik qyzmeti qoljetimdi. Olar – 14 servıstik qyzmet jáne 5 sıfrlyq qujat.
– Tehnologııalyq úderiste memlekettik apparatty sıfrlandyrý qazirgi zamanǵy basqarýdyń jáne azamattardy sapaly memlekettik qyzmettermen qamtamasyz etýdiń ajyramas bóligine aınalyp keledi. Búginde mınıstrlik «Digital Justice» – sıfrlyq Ádilet jobalarynyń portfelin iske asyryp jatyr. Taıaýda ótken «Digital bridge 2023» forýmynda Ádilet mınıstrligi Memleket basshysy men Premer-mınıstrge «Sıfrlyq notarıat» jobasyn tanystyrdy. Iske qosylǵan sátten bastap 20 myńnan asa senimhat rastaldy. Buǵan 4 800 notarıýs jumyldyryldy. Bul qyzmet tek osy jyldyń 25 qyrkúıeginen bastap engizilgenin eskersek, osy aralyqta erli-zaıyptylardyń 609 onlaın kelisimi rastaldy. Búginde mınıstrlik Múlik ıeleri birlestigin (MIB) qurý jáne onyń qyzmeti sheńberinde elektrondyq daýys berý boıynsha qanatqaqty jobaǵa bastamashylyq jasady. Buǵan deıin MIB-in tirkeý nemese onyń tóraǵasyn aýystyrý úshin bizge daýys berý hattamalary, tıisti ótinishter men habarlamalar jiberiletin edi. Daýys berý úrdisindegi zań buzýshylyq pen jınalys hattamalaryndaǵy qoldardy burmalaýǵa baılanysty daýly jaǵdaılar jıi týyndaýyna baılanysty bul máseleni elektrondyq-sıfrlyq qoltańbany paıdalana otyryp, elektrondyq daýys berý rásimine aýystyrdyq. Úderis barysynda barlyq oqıǵa tıisinshe tirkeledi jáne hattama avtomatty túrde onlaın jasalady, – dedi B.Moldabekov.
Azamattar úshin jasalǵan taǵy bir múmkindik – «eGov mobile» qosymshasy arqyly onlaın formatta keńes alý. Iаǵnı platformada otandastarymyz notarıattyq is-áreketke baılanysty kez kelgen zańdy suraqtardy qoıa alady. Aıta keterligi, bul qyzmet aqyly. Shamamen quny 1 AEK mólsherinde bolady. Buǵan qosa boryshtyq júktemeni azaıtý úshin atqarýshylyq qujatty avtomatty túrde qozǵaý jáne boryshkerge habarlama jiberý boıynsha arnaıy robot ázirlengen. Bul sot oryndaýshynyń qyzmetine aqy tóleýge jáne qosymsha qarjylyq shyǵyndardy azaıtýǵa múmkindik beredi. Buǵan deıin jeke sot oryndaýshysy atqarýshylyq is júrgizýdi májbúrlep oryndaǵan kezde boryshkerlerden negizgi borysh somasy jáne óndirip alý somasynyń 3%-dan 25%-ǵa deıingi mólsherde qosymsha komıssııa alynatyn-dy.
– Boryshkerlerdi olardyń tabysyna teń-proporsıonaldy alıment tóleýge yntalandyrý maqsatynda «Smart Data Ukimet» platformasynda taldamalyq keıs iske asyryldy. Taldama arqyly jumys berýshiniń jalaqynyń durys eseptelýin teksere otyryp, boryshkerdiń tabysyn uıymdaǵy basqa mamandardyń ortasha jalaqysymen salystyrý negizinde júrgiziledi. Bul tetik alıment tóleý somasyn azaıtý úshin boryshkerdiń tabysyn jasyrý faktilerin anyqtaýǵa jol ashady. Sondaı-aq «Attestattaý reınjınırıngi» bar. Mınıstrlik kásiptik qyzmettiń bes salasynda (jeke sot oryndaýshylar, notarıýstar, advokattar, sot sarapshylary jáne patenttik senim bildirilgen ókilder) attestattaýdy júzege asyrady. Qoldanystaǵy úrdis kompıýterlik testileýden basqa komıssııalyq baǵalaý kezeńin (áńgimelesý), sondaı-aq komıssııadan qaıta ótý qajet bolǵan jaǵdaıda komıssııanyń kezekti otyrysy 3 aıdan keıin ótetin bolady. Osy jyldyń mamyr aıynda attestattaý boıynsha qyzmetterdiń reınjınırıngi ótkizildi. Komıssııalyq áńgimelesý kezeńi sıtýasııalyq suraqtarǵa aýystyryldy. Bul attestattaý rásiminiń ashyqtyǵyn arttyrdy. Adamı faktor joıylyp, birshama ýaqyt únemdeldi. Qanatqaqty joba iske qosylǵan sátten bastap 326 azamat attestattaýdan sátti ótti, – dedi Ádilet vıse-mınıstri.
