11 kúnniń ishinde 16 sport túrinen 1500-den astam atlet 954 medaldi ózara sarapqa saldy. Onyń 259-y altyn, 259-y kúmis bolsa, qalǵan 436-sy qola.
Qazaqstan delegasııasy 12 altyn, 13 kúmis pen 23 qola medal jeńip alyp, jalpy esepte 3-orynnan kórindi. Kósh basynda Ýkraına (21 altyn, 17 kúmis, 15 qola), odan keıin sońǵy jarys kúni ekinshi orynǵa kóterilgen Saýd Arabııasy (12 altyn, 20 kúmis, 19 qola) tur. Osy tusta sportshy jibergen 120-dan astam eldiń 87-sine júlde buıyrǵanyn aıta keteıik.
Qazaqstan delegasııasy úshin Ar-Rııadtaǵy keshendi jarystyń ár kúni tarıhı nátıjemen este qalyp otyrdy. Máselen, oıyndar baǵdarlamasyna alǵash ret qosylǵan qazaq kúresi men armrestlıngten Ulttyq qurama sportshylary tabysty óner kórsetip, komandalyq esepte 1-oryn aldy. Sambo men grepplıngten qorjynǵa World Combat Games-tiń alǵashqy altyny tússe, karateshiler birinshi ret júldegerler qatarynan kórindi. Jalpy el namysyn 10 sport túrinen kelgen 53 sportshy qorǵady.
«Bul oıyndarǵa keıbir sporttan negizgi quramdy alyp kelmesek te, barynsha sapaly quram jasaqtaýǵa tyrystyq. Biz úshin ulttyq sportymyz qazaq kúresiniń oıyndar baǵdarlamasyna alǵash ret kirgeni qýantarlyq jaıt. Palýandarymyz jaqsy nátıje kórsetti. Dál osylaı armrestlıngke qatysty aıtýǵa bolady. Ulttyq qurama alǵa qoıylǵan jospardy oryndady. Osy jerde qandaı kemshilikter baryn da kórdik. Endi solardy taldap, bapkerlermen birge osy baǵytta jumysty qolǵa alamyz», dedi QR TSM Sport jáne dene shynyqtyrý isteri komıtetiniń bas mamany Kelbet Nurǵazına.
Osy kórsetkishtiń arqasynda Qazaqstan jaýyngerlik óner oıyndarynyń jalpy reıtınginde 37-den úzdik ondyqqa kirdi. Osyǵan deıin Beıjiń men Sankt-Peterbýrgti qosqanda qorjynǵa 1 altyn, 3 kúmis jáne 5 qola túsken.
«Oıyndar kezinde 16 sporttyń ishindegi aıkıdo, armrestlıng, djıý-djıtsý, mýaıtaı, sambo men savateden (fransýz boksy) para-atletter arasynda arnaıy jarys ótti. Jekpe-jek óneriniń jankúıerlerine básekelerdi resmı saıttan tikeleı efırde kórsettik. Habar taratýshylardyń arqasynda 100-den astam memlekettiń aýmaǵyna sıgnal tarattyq», dedi «Sport Akkord», ıaǵnı oıyndar prezıdenti Ivo Ferrıanı.
Aıta keteıik, kelesi oıyn 2025 jyly ótpek. Qabyldaıtyn memlekettiń aty kelesi jyldyń basynda jarııalanady.
