Foto: Facebook/Erlan Saırov
«Bıýdjette kedeıshilikpen kúres máselesi álsiz qarastyrylǵan. Qazir Qazaqstanda 1 mln 16 myń adam resmı túrde kedeı bolyp tirkelgen. Joqshylyqtyń ótip ketkeni sonshalyq adamdar nan, makaron, et alý úshin nesıe alýǵa májbúr», dedi depýtat.
Depýtattyń aıtýynsha, jaǵdaıy nashar azamattar úshin bólingen 9 myń grantpen 1 mln 16 myń adamdy qamtamasyz etý múmkin emes.
«Tórelerdiń ásire baıýy hám buqara halyqtyń jappaı kedeılený tendensııasy jalǵasyp jatyr, bul óte qaýipti. Sondyqtan kedeıshilikten zardap shegip otyrǵan adamdarǵa bıýdjette arzandatylǵan mıkronesıeler jelisin uıymdastyryp, bıznes-daǵdy qalyptastyryp, atalǵan sanattaǵy azamattardy ekonomıkalyq aınalymǵa qosý óte mańyzdy. Mine osy másele bıýdjette qarastyrylmaǵan», dedi Erlan Saırov.
Depýtattyń sózinshe, halyqtyń ómir sapasyn arttyrý qajet. Sondyqtan Úkimet janynan kedeıshilikke qarsy ulttyq is-qımyl komıssııasyn quryp, halyqtyń jappaı kedeıshilik problemasyn sheshýge bıýdjetti burý qajet.
«Kedeıshilikke qarsy is-qımyl komıssııasy qashan qurylady? Bıýdjette kedeı azamattardyń múddesin qashan tolyqqandy qorǵaımyz, álde istiń nasyrǵa shapqanyn tosyp otyrmyz ba?», degen suraq qoıdy májilis depýtaty.
Osy oraıda «Amanat» fraksııasynyń múshesi, májilis depýtaty Erlan Saırovtyń suraǵyna Premer-mınıstrdiń orynbasary Tamara Dúısenova jaýap berdi.
«Tolyq kelisemin. Sheshimi bar. Úkimettiń janynan halyqtyń tabysyn arttyrý jónindegi jobalyq ofıs qurdyq, oǵan ulttyq ekonomıka mınıstrligi men aýyl sharýashylyǵy mınıstrliginiń, «Amanat» partııasynyń ókilderi jáne basqa memlekettik organdardyń ókilderi endi», dedi T.Dúısenova.
Tamara Dúısenovanyń aıtýynsha, jaǵdaıy nashar azamattarǵa arnalǵan 2,5 paıyzdyq nesıe alý qarastyrylǵan, odan bólek, jastarǵa arnalǵan dál sondaı 2,5 paıyzdyq nesıe alý jobasy bar.
«Nesıe jóninde bıyl ózimizdiń usynystarymyzdy berdik, bıýdjettik komıssııa qabyldady. 2 myń 258 aýyldyń jaǵdaıyn qarap shyqtyq. Árbir aýyldaǵy kedeıshilik deńgeıi, jumyspen qamtý jáne árbir aýyldyń qaı baǵytta mamandandyrylǵany jóninde qazirgi ýaqytta barlyq maǵlumattar kelip tústi. Ortalyq ofıs sony naqtylap jatyr. Aıdyń sońynda máslıhat depýtattary men jergilikti organdardyń jáne ózderinizdiń qatysýlarynyzben biz árbir oblysqa baılanysty naqty is-sharany talqylaıtyn bolamyz», dedi vıse-mınıstr.
