Atap aıtsaq, Ashat Kýchınchırekovtiń «Baýyryna salý», Darhan Tólegenovtiń «Aǵaıyndylar», Aısultan Seıitovtiń «Qash» fılmi marapatqa laıyq dep tanyldy. Habarlamada úsh fılm de rejısserlerdiń debıýttik jumysy dep baǵalandy.
«Baýyryna salý» «Úzdik jastar fılmi» atalymynda top jarsa, «Aǵaıyndylar» kartınasynyń basty rólderin somdaǵan Aıbar Saly men Álisher Ismaılov «Úzdik jańa qoıylym» atalymy boıynsha júldege ıe boldy. Al «Qash» lentasy «Úzdik operatorlyq jumys» atalymyn jeńip aldy. Aıta keteıik, «Baýyryna salý» lentasynyń álemdik premerasy osy jyldyń kúzinde Ispanııanyń San-Sebastıan qalasynda ótken kınofestıvalda «Jańa rejısserler» baǵdarlamasynda kórsetilgen edi.
«Aǵaıyndylar» fılmi ótken jyldyń qyrkúıek aıynda Germanııadaǵy Oldenburg International Film Festival festıvalinde «Kıno rýhy» syılyǵyn jeńip aldy, al bıyl sáýirde elimizdiń Kınosynshylar qaýymdastyǵy 2022 jylǵy «Úzdik drama» dep baǵalady. Sonymen qatar atalǵan fılm Italııa, Reseı, О́zbekstan, Qytaı, Ispanııa, Bolgarııadaǵy halyqaralyq kınofestıvaldardyń 10 marapatyna ıe bolǵan.
«Qash» fılminiń rejısseri Aısultan Seıitov osy jazda Shanhaı halyqaralyq kınofestıvalinde «Úzdik rejısser» atalymyn jeńip alǵanyn da eske salaıyq.
APSA syılyǵy 2007 jyly IýNESKO men FIAPF-halyqaralyq kınoprodıýserler qaýymdastyǵynyń kómegimen Aýstralııa úkimetiniń bastamasymen qurylǵan. О́ner dodasy kıno áleminde «Azııa Oskary» dep te atalady. Syılyq Azııa-Tynyq muhıty aımaǵynyń 70-ten astam eliniń ókilderi jasaǵan kórnekti kartınalarǵa beriledi. О́tken jylǵy jeńimpazdar qatarynda 2019 jyly «Úzdik rejısser» atalymynda jeńiske jetken otandyq rejısser Ádilhan Erjanov bar.
