Sergeı Nıkolaevıchtiń ustazdyq eńbek joly 1992 jyldan bastaý alady. Sodan beri talaı tehnıka mamandaryn tárbıelep shyǵarǵan tájirıbeli ustaz búginde kolledj dırektorynyń oqý-óndiris isi jónindegi orynbasary qyzmetin atqarady.
«Azattyǵyn jańa ǵana alǵan jas respýblıkanyń búgingideı ózge memlekettermen terezesi teń táýelsiz el bolyp qalyptasý jolyndaǵy alǵashqy derbes qadamy ońaıǵa soqqan joq. Árkim óz salasynda tynymsyz eńbek etti, talmaı izdenip, ter tókti. Bizge de osy kolledjdiń materıaldyq bazasyn, óndiristik oqytý júıesin óz kúshimizben jańartyp, qaıta jasap, túbegeıli ózgertip shyǵýǵa týra keldi. Esesine elimiz órkendep, damı bastaǵan tusta memlekettiń qoldaýyn arqa tutyp, kóptegen jańa jobany iske asyrdyq. Máselen, 2014 jyly «О́ńirlerdi damytý» baǵdarlamasy arqyly Dúnıejúzilik damý bankiniń qarjylaı grantyn utyp aldyq. Bul qarjyǵa oqý óndirisine qajet jańa traktor, qozǵaltqyshtar, tokar stanoktaryn, ózge de zamanaýı qurylǵylardy satyp alyp, tokar sheberhanasyn tolyq jańarttyq», deıdi ol.
2010 jyly Sergeı Nıkolaevıchtiń shákirti Samat Saǵalov avtomobıl jóndeý slesary mamandyǵy boıynsha Almatyda ótken respýblıkalyq «Kásibı sheberlik» baıqaýynda birinshi oryndy jeńip alady. Nátıjesinde, jeńimpaz stýdent pen ustazy Ońtústik Koreıada ótken «WorldSkills» halyqaralyq baıqaýyna joldama aldy. «WorldSkills» konkýrsyn tokar, dánekerleýshi, slesar sekildi jumysshy mamandardyń chempıonaty desek te bolady. Osylaısha, tálimger-ustaz tuńǵysh ret Ońtústik Koreıanyń maman daıarlaýdaǵy artyqshylyǵyn, baı sheberhanasy men oqý-materıaldyq qoryn kórip, tanysady. Koreıa eliniń jumysshy mamandyǵyna degen erekshe yqylas tanytyp, asa qurmetpen qaraıtynyna, baıqaý jeńimpazyna beriletin qarjylaı syılyqtyń qomaqty ekenine, jumysshylar arasyndaǵy básekeniń óte joǵary ekenine tańǵalyp, tánti bolady.
Osy baıqaýdan oralysymen Sergeı Býlat kolledj stýdentterine arnalǵan jańa sheberhanalar ashý isine den qoıady. Odan keıin kolledjdiń 12 muǵalimimen birge Sıngapýrge baryp, bir aılyq biliktiligin arttyrý kýrsyn támamdaıdy. Bul elden tájirıbe baıytyp, maman daıarlaýdyń tyń joldaryn, tıimdi ádisterin kóńilge túıip qaıtqan jańashyl pedagog kele salysymen kolledj janynan oqý kásipornyn ashýǵa kirisedi.
«Biz ózimizdiń shaǵyn tehnıkalyq qyzmet kórsetý ortalyǵyn ashtyq. Bul ortalyq stýdent alǵan teorııalyq bilimdi tájirıbe júzinde bekitip otyrýǵa jol ashty. Keıin stýdentterge ózderi minip júrgen jeke kólikterin osynda ákelip jóndeýge ruqsat berdik. О́z mashınasy bolǵan soń, jóndeý jasap jatqan stýdent burynǵydaı emes, ár nársege muqııat qaraıtyn boldy. Keıbir kúrdeli aqaýlar tóńireginde aqyl-keńes surap, keıde pikir talastyryp, kádimgideı izdenetin boldy. Bul da oqytýdyń tıimdi ádisteriniń biri dep esepteımin», deıdi pedagog.
2016 jyly Qazaqstan «WorldSkills» halyqaralyq qozǵalysyna múshe bolyp tirkeldi. Kelesi jyly Astanada tuńǵysh ret júk kólikterin jóndeý mamandyǵy boıynsha «WorldSkills» halyqaralyq konkýrsy ótti. Baıqaýǵa bas sarapshy retinde Sergeı Býlat ta qatysty. Astana konkýrsynan birsypyra tájirıbe jınaqtaǵan oqytýshy-ustaz 2017 jyly Abý-Dabıde ótken álem chempıonatyna shákirtin alyp bardy.
«Ońtústik Koreıaǵa biz qonaq retinde barsaq, Abý-Dabıge shákirtim tolyqqandy konkýrsqa qatysýshy, ózim sarapshy retinde qatystyq. Men ol jerde baıqaýǵa tórelik jasaý tártibin úırendim. Mundaı joǵary deńgeıdegi konkýrsqa sarapshy bolý úshin aldymen óz mamandyǵyńa, konkýrs erejesine qatysty 100 saýaldan turatyn test tapsyrýyń qajet. Odan keıin aǵylshyn tilinen test, óz mamandyǵymyzben baılanysty tájirıbelik emtıhan tapsyrdyq. О́ıtkeni baıqaý úmitkerlerin baǵalaý úshin aldymen ózińniń soǵan laıyqty ekenińdi dáleldeýiń kerek. Men berilgen tapsyrmanyń bárin qınalmaı oryndap shyqtym. О́ıtkeni «WorldSkills» standarttarynda qamtylǵan tapsyrmalardyń bári – ózimiz oqytyp júrgen dúnıeler», deıdi ustaz.
2018 jyly Sergeı Býlat Qostanaı avtokólik kolledjinde tuńǵysh ret respýblıkalyq «WorldSkills» konkýrsyn uıymdastyrdy. Munda stýdentter jelilik júıeler, jeńil kólik jáne júk kóligin jóndeý, qurastyrý boıynsha bilim jarystyryp, tájirıbe almasty. Jumysshy mamandyqtardy dáripteıtin konkýrs Qostanaı kolledjinde osydan keıin de birneshe ret uıymdastyrylyp, avtomobıl ónerkásibiniń qyr-syryn úırenip júrgen qazaq balalarynyń halyqaralyq «WorldSkills» baıqaýlaryna qatysyp, júldeli oryndardan kórinýine jol ashty. Búginde kolledjde Bolgarııada, Qazanda ótken «WorldSkills» jarystarynyń júldegerleri oqyp júr.
Sergeı Býlat – qazir stýdentterge ǵana emes, jas muǵalimderge de aqyl-keńesin berip, qamqorshy bolyp júrgen tálimger ustaz.
«Men osydan birneshe jyl buryn ashylǵan qazaq toptaryna sabaq beremin. Keıde kúrdeli taqyryptardy ótken kezde nemese kolledj sheberhanalaryndaǵy zamanaýı qurylǵylardy paıdalaný barysynda sabaqqa Sergeı Nıkolaevıchtiń ózi kelip, balalarǵa túsindirip, bizge ádistemelik keńes berip ketedi», deıdi óndiristik oqytý sheberi Álibek Qozyqanov.
Qostanaı oblysy
