Kezinde Federasııa kýbogi degen ataýǵa ıe bolǵan týrnırdiń tusaýy 1963 jyly kesildi. 2020 jyldan beri oǵan Bıllı Djın Kıngtiń esimi berildi. 1968-1980 jyldar aralyǵynda atalǵan tennısshi «Úlken dýlyǵa» sanatyndaǵy jarystarda 13 márte top jardy. Tarqatyp aıtsaq, Ýımbldondy 6 ret, AQSh-tyń ashyq birinshiligin 4 ret jáne Aýstralııanyń ashyq birinshiligi men Rolan Garrosty bir-bir retten utty. Sonymen qatar juptyq saıysta 16 jáne mıkste 11 márte mereıi ústem boldy. Barlyǵy – 39 týrnırde aldyna jan salmady! Bıllı Djınniń odan da basqa tolyp jatqan ataǵy bar. Sporttyq mansabyn aıaqtaǵannan keıin Kıng bapker boldy. Onyń jetekshiligimen AQSh quramasy talaı tolaıym tabysqa qol jetkizdi. Byltyr jarys Shotlandııanyń Glazgo qalasynda ótip, fınalda Shveısarııa men Aýstralııa quramalary sheberlik baıqasty. Bul básekede eýropalyqtardyń mysy basym boldy.
Atalǵan jarysta AQSh quramasynyń 18 ret asyǵy alshysynan tússe, Chehııa 11 márte shashasyna shań juqtyrmady. Buǵan qosa Aýstralııa – 7, Ispanııa men Reseı – 5, Italııa – 4, Fransııa – 3, Germanııa – 2, Belgııa, Slovakııa, Shveısarııa jáne OAR 1 retten dara shyqty. Jekelegen oıynshylar arasynda rekordtyq kórsetkish Krıs Evertke tıesili. О́tken ǵasyrdyń 70-80-jyldary atoı salǵan áıgili amerıkalyq tennısshi 8 dodada daralandy. Rozmarı Kasals pen Bıllı Djın Kıng jeti ret teńdessiz dep tanyldy. Olardyń ekeýi de – AQSh-tan. Chehııalyq Petra Kvıtova men Barbora Strysova alty márte bas júldeni oljalady. Lýsııa Gradeskaıa men Lýsııa Shafarjova (Chehııa), Konchıta Martınes pen Aranta Sanches-Vıkarıo (Ispanııa) bes retten dál sondaı qurmetke bólendi.
Bıylǵy Bıllı Djın Kıng Kýboginde ádettegideı 12 komanda óner kórsetedi. Qazaqstan «V» tobyna tústi. Qarsylastarymyz – Aýstralııa men Slovenııa. О́zge toptarda myna quramalar kúsh synasady: A toby – Chehııa, Shveısarııa, AQSh. S toby – Ispanııa, Polsha, Kanada. D toby – Italııa, Germanııa, Fransııa.
Pıreneı túbeginde Qazaqstan quramasy sapynda Elena Rybakına, Iýlııa Pýtınseva, Anna Danılına, Jibek Kulambaeva jáne Arýjan Saǵandyqova óner kórsetedi. Alǵashqy úsheýiniń esimi jankúıerlerge jaqsy tanys. Qazirgi kezde Elena WTA reıtınginde tórtinshi orynda tursa, Iýlııa 69 satyǵa taban tiredi. Al Annanyń juptyq saıysta óte keremet oınaıtyny belgili. Al Jibek pen Arýjan – daryndy jastardyń sanatynda.
Qarsylas komandalar oıynshylarynyń deńgeıi jerlesterimizge qaraǵanda áldeqaıda tómen ekeni anyq. Máselen, Aýstralııanyń sapynda Kımberlı Bırrell (álemdik reıtıngte 113-orynda), Astra Sharma (120-oryn), Olıvııa Gadekı (132-oryn), Arına Rodıonova (148-oryn) syndy tennısshiler óner kórsetedi. Slovenııanyń sapynda Tamara Zıdanshek (100-oryn), Kaııa Iývan (104-oryn), Veronıka Erıaves (183-oryn), Dalıla Iаkýpovıch (224-oryn), Polona Hersog (327-oryn) sekildi oıynshylar bar. Joǵarydaǵy málimetter arqyly V tobynyń favorıti Qazaqstan quramasy ekenin anyq ańǵarýǵa bolady. Biraq olardy mensinbeýge esh bolmaıdy. О́ıtkeni jasyl qurlyqtan keletin komandandanyń sapynda myqtylar bolmaǵanymen, byltyr olar aqtyq synǵa deıin alqynbaı jetken. Sondyqtan da burymdylarymyz bul týrnırde baryn salýǵa tıis.
12 qarashaǵa deıin sozylatyn Bıllı Djın Kıng Kýboginiń júlde qory 9,6 mln dollardy qurap otyr. Bas júldeni oljalaǵan komanda 2,4 mln-dy oljalasa, aqtyq saıysta utylǵany 1,44 mln-dy ıelenedi. Jartylaı fınalǵa deıin jetkenderi 960 myńdy enshileıdi. Al toptyq týrnırde súringen quramalardyń árqaısysyna 480 myń dollardan tabys etiledi.
