Jarystyń alǵashqy eki kúninde Margarıta Bajaeva (50 kg) men Erasyl Qoıshybaevtyń (88 kg) – kúmis, al Gúldana Álmentaeva (54 kg), Arnur Qýantaı (71 kg) jáne Shynar Abatova qola júldeni ıelengeni jaıynda biz buǵan deıin de jazǵanbyz. Alaıda qorjynymyzda altyn medaldiń bolmaýy bizdiń kóńilimizge selkeý túsirdi. Keshe sol olqylyqtyń orny toldy. +80 kg salmaqta kúsh synasqan Araılym Ábenova fılıppındik Sıdneı Sı men rýmynııalyq Bıanka Prodany utyp, fınalda Reseıdiń týy astynda óner kórsetip júrgen Janara Qusanovamen kezdesti. Orynbor oblysynyń týmasy kezinde qyzdar arasynda álem chempıony atandy. Áıelder saıysynda da ol ózin jaqsy qyrynan kórsete bildi. Qandasymyzdyń álem chempıonatynyń qola jáne Eýropa oıyndarynyń kúmis júldegeri, Reseı chempıonaty men kýboginiń úsh dúrkin jeńimpazy degen ataqtary bar. Qos qazaq qyzynyń aıqasy óte shıelenisti ótip, bul básekede Janardyń baǵy jandy. Osylaısha, Ábenova jeńis tuǵyrynyń eń bıik satysyna kóterildi.
98 kg salmaq dárejesinde kúresken Álibek Zekenov mońǵolııalyq Gaajadamba Banuńh pen fılıppındik Sı Shınoǵa shań qaptyrǵanymen, jartylaı fınalda armenııalyq Davıd Grıgorıannan aılasyn asyra almady. Al qola medal úshin tartysta ol tájikstandyq Bahtovar Zamırovti tize búktirdi.
Sóıtip, 1 altyn, 2 kúmis jáne 4 qola medaldi ıelengen Qazaqstannyń samboshylary álem chempıonatynyń jalpy komandalyq esebinde úshinshi orynǵa turaqtady. Birinshi orynda – Reseı quramasy. Olar 7 altyn, 1 kúmis jáne 3 qolany oljalady. Ekinshi satyǵa О́zbekstannyń balýandary jaıǵasty. Ala taqııaly aǵaıyndarymyz 2 altyn men qola júldeni enshiledi.
