Baıraqty báseke bastalmaı turyp-aq Qazaqstannyń jankúıerleri jaısyz habar aldy. Byltyr Ýımbldonda top jaryp, bıyl Aýstralııanyń ashyq birinshiliginiń fınalynda oınaǵan elimizdiń birinshi jáne álemniń tórtinshi raketkasy Elena Rybakınanyń atalǵan jarysqa qatyspaıtyny belgili boldy. Respýblıkalyq Tennıs federasııasy taratqan málimetke sensek, osydan bir apta buryn ǵana Meksıkanyń Kankýn qalasynda ótken WTA-nyń qorytyndy týrnırinen keıin ol ózin jaısyz sezingen eken. Sol sebepti Bıllı Djın Kıng kýboginde baq synaýdan bas tartty. Sodan Aýstralııaǵa qarsy kezdesýdiń qarsańynda Rybakınany dereý Anna Danılınamen almastyrýǵa týra keldi. WTA tiziminde 814-orynda turǵan dáp sol oıynshy Sevılıadaǵy jarystyń tusaýkeser saıysynda kortqa shyqty. Ol úzdikter reıtınginde 172-satyǵa jaıǵasqan tájirıbeli Storm Hantermen sheberlik baıqasty. Bul básekede jasyl qurlyqtyń ókili 7:6, 6:4 esebimen basym tústi.
Kóp keshikpeı Iýlııa Pýtınseva men Kımberlı Bırreldiń oıynyn tamashaladyq. Bul kezdesýdiń favorıti Pýtınseva edi. Álemdik reıtıngte ol 69-oryndy ıelenýde. Qarsylasy jerlesimizden 44 saty tómen tur. Sondyqtan da bul básekede Pýtınsevanyń jeńiske jetetinine kópshiliktiń kúmáni bolǵan joq. Aıtqandaı-aq, birinshi setti 6:0 esebimen aıaqtaǵan Iýlııa ekinshisinde de óziniń myqtylyǵyn moıyndatty – 7:5.
Qos oıynnyń nátıjesi boıynsha teń esep tirkelgennen keıin básekeniń taǵdyry juptyq saıysta sheshildi. О́kinishke qaraı, bul joly bizdiń burymdylar óz deńgeıinde óner kórsete almady. Iýlııa Pýtınseva men Anna Danılına juby Ellen Peres pen Storm Hanterge 1:6, 6:4, 5:10 esebimen ese jiberdi. Osylaısha, otandastarymyz Aýstralııa quramasyna jol berdi.
Kelesi kúni Slovenııamen saıysqa tústik. Alǵashqy básekede Anna Danılına Kaııa Iývanǵa oısyraı utyldy – 1:6, 0:6. Kelesi kezdesýde Tamara Zıdanshektiń ekinshi setten keıin oıyndy jalǵastyrýdan bas tartyp, jeńis Iýlııa Pýtınsevanyń enshisine jazyldy. Odan keıin Anna Danılına men Jibek Kulambaeva juby Veronıkı Erıaves pen Ela Naly Mılıchten basym tústi – 2:6, 6:4, 10:7. Qorytyndy esep – 2:1.
Desek te bul jeńis jerlesterimizge pleı-offqa shyǵý úshin jetkiliksiz boldy. О́ıtkeni Bıllı Djın Kıng kýboginiń erejesine saı ár toptan ozyq shyqqan bir ǵana komanda jartylaı fınalda óner kórsetý qurmetine ıe bolady. О́kinishke qaraı, Qazaqstan quramasy ekinshi orynda qalyp qoıdy. Al jalǵyz joldama Slovenııa tennısshilerine buıyrdy. Olardan bólek, Italııa, AQSh jáne Kanada quramalary pleı-offqa shyqty.
