Serik Sápıev Qaraǵandy oblysynyń Abaı qalasynda dúnıege keldi. Dál osy shaharda jeńispen órilgen baı dástúri bar myqty boks mektebi qalyptasqanyn kózi qaraqty jankúıerler jaqsy biledi. Kezindegi Eýropa men KSRO chempıony Serik Nurqazov, kásipqoılar arasynda beldi nusqalar boıynsha álemniń birneshe dúrkin chempıony atanǵan Oleg Maskaev pen Natalıa Ragozına, kóptegen dúbirli dodada daralanǵan Baqytjan Amanbaev pen Danııar Muńaıtpasov, álem chempıonatynyń úsh dúrkin qola júldegeri Abylaıhan Júsipov jáne taǵy basqa kóptegen tanymal bylǵary qolǵap sheberleri Abaı mektebinen túlep ushqan. Serik te – solardyń biri ári biregeıi.
Bir aıta keterligi, Seriktiń ákesiniń týǵan inisi de kezinde qarymdy boksshy bolǵan. О́tken ǵasyrdyń jetpisinshi jyldary 51, 54, 57 kg salmaq dárejelerinde kúsh synasqan Baqytaı Sapeev elishilik jarystarda qarsylas shydatpaı, búkilodaqtyń arenada da ózin moıyndatty. Ol – Qazaqstannyń eki dúrkin chempıony, KSRO chempıonatynyń kúmis jáne qola júldegeri, Dostyq oıyndary jáne KSRO men AQSh quramalarynyń matchtyq kezdesýiniń jeńimpazy. Osy tabystarynyń arqasynda Baqytaı halyqaralyq dárejedegi sport sheberi ataǵyn aldy.
11 jasynan bilikti bapker Aleksandr Strelnıkovtiń qol astynda jattyqqan Serik 2004 jyly qyraǵy mamandardyń nazaryna ilikti. Sol maýsymda ol áskerıler arasyndaǵy álemdik dodada dara shyǵyp, Qazaqstan chempıony atandy. Qazaqtyń asa daryndy boksshysynyń odan keıingi júrip ótken joly jarqyn jeńisterge toly. Endi solardyń arasyndaǵy eń mańyzdylaryna toqtalaıyq.
2005 jyly Qytaıdyń Mınıan qalasynda Sápıev 64 kg salmaq dárejesi boıynsha álem chempıony atanady. Qytaı elinde ol slovakııalyq Tıbor Glavaskı (37:13), amerıkalyq Karl Dagan (37:26), ýkraınalyq Nıkolaı Semenıagý (27:15), ázerbaıjandyq Emıl Magerramovty (41:23) jáne ózbek Dilshot Mahmýtovty (40:21) esh qınalmaı jeńdi. 2007 jyly Chıkagoda Serik sol nátıjesin qaıtalady. Bul joly ol, tipten keremet óner kórsetti. Tusaýkeser kezdesýinde serbııalyq Mılan Pıpeskıdi (22:6) 18 upaı aıyrmashylyǵymen utty. Odan keıingi tórt básekede aıqyn basymdyq tanytty. Atap aıtsaq, nıkaragýalyq Edýardo Mendoza (2 raýnd), kanadalyq Kevın Bızer (3 raýnd), ırandyq Murtaz Sepahvandı (4 raýnd) jáne japonııalyq Masatsýgı Kavashı (3 raýnd) qandasymyzdyń ońaı oljasyna aınaldy. Fınalda álem chempıonatynyń kúmis júldegeri, Eýropa chempıony, reseılik Gennadıı Kovalevtiń silikpesin shyǵardy. Ol ony aldap ta, arbap ta uryp, 20:5 esebimen erkin eńserdi. Sol sekildi Serik 2010 jylǵy Azııa oıyndary jáne 2007 men 2009 jylǵy qurlyq chempıonattarynda óziniń myqtylyǵyn túbegeıli moıyndatty. Atalǵan jarystyń barlyǵynda qazaqtyń uly qarsylastaryn bas kótertpeı sabady.
Álem chempıonattarynda Serik taǵy eki ret júldegerler sanatyna qosyldy. 2009 jyly Mılanda qola medaldy qanaǵat tutty. Apennın túbeginde qandasymyz 69 kg salmaq dárejesinde saıysqa tústi. Alǵashqy aınalymdarda ol gabondyq Hýgo Mıenıkýe (2 raýnd) pen ázerbaıjandyq Emıl Maharramovty (3 raýnd) merziminen buryn utsa, kóp keshikpeı ýkraınalyq Taras Shelestıýkke (16:11) shań qaptyrdy. Odan keıin qyrǵyz Asadýllo Baımuratovty (2 raýnd) ońdyrmaı sabady. Biraq jartylaı fınalda oıda-joqta reseılik Andreı Zamkovoıǵa (10:16) ese jiberdi.
2011 jyly Bakýde ekvadorlyq Karlos Sanches (3 raýnd), taılandtyq Apıet Sansıt (2 raýnd), japonııalyq Iаsýhıro Sýdzýkı (21:12), amerıkalyq Errol Spens (20:10) jáne lıtvalyq Egıdııýs Kavalıaýskas (2 raýnd) aqtyq synǵa deıin alqynbaı jetti. Alaıda fınalda S.Sápıev Ýkraınanyń ókili Taras Shelestıýkke (10:16) jol berdi.
Olımpııa oıyndaryna Serik Sápıev eki ret qatysty. 2008 jyly Beıjińde oǵan tóreshiler kópe-kórneý qııanat jasady. Shırek fınalda qazaq jigiti Taı eliniń ókili Manýs Býnjamongpen kúsh synasty. Afına Olımpıadasy men Azııa oıyndarynyń jeńimpazy básekeniń basynan aıaǵyna deıin rıngte aınala qashyp júrip aldy. О́zi mardymdy bir soqqy da jasamady. Sápıev shabýyldasa, kirerge tesik tappaı qaıta-qaıta qarsylasynyń qolynan ustap, erejeni óreskel buzdy. Soǵan qaramastan tóreshi Býnjamongty jeńimpaz dep jarııalady.
2012 jyly London Olımpıadasyna Serik «bes qarýyn asynyp» bardy. Bul joly ony toqtatatyn kúsh joq edi. Tumandy Albıon elindegi jarystyń bastapqy básekelerinde qazaqtyń ór minezdi uly japonııalyq Iаsýhıro Sýzýkı (25:11) men veneseýalalyq Gabrıel Maestre Perezdi (20:9) esh kınalmaı utyp, jartylaı fınalda Reseıdiń dúldúli Andreı Zamkovoımen qaıta qolǵap túıistirdi. Dál sol sańlaqtan qandasymyz úsh jyl buryn Mılandaǵy álemdik dodada ese jibergen edi. Bul joly Sápıev Zamkovoıdyń (18:12) jaqsylap turyp sazaıyn berdi. Fınalda qazaq boksshysy ulybrıtanııalyq Fred Evanspen sheberlik baıqasty. Jergilikti jankúıerler barynsha qoldaý kórsetkenine qaramastan qandasymyz onyń osal tusyn tapty. Básekeniń basynan aıaǵyna deıin shabýyldaǵan Serik soqqylaryn dál darytyp, Evanstyń erkin kósilýine esh múmkindik bermedi. Nátıjesinde, aqtyq saıys 17:9 esebimen Sápıevtiń paıdasyna sheshildi. Jarys aıaqtalǵan bette qandasymyzǵa Olımpııa oıyndarynyń altynymen qosa, eń úzdik boksshyǵa tıesili Vel Barker kýbogi tabys etildi.
Qazaqstan sporty tarıhynda óshpes iz qaldyrǵan Serik Sápıev bylǵary qolǵabyn shegege ilgennen keıin de bul saladan alystaǵan joq. Áýeli «Bolashaq» baǵdarlamasy boıynsha Londondaǵy Brýnel Ýnıversıtetinde bilimin jetildirdi. Dúnıejúzilik boks serııasy (WSB) dodasynda óner kórsetken «Astana arlans» klýbyn basqardy. Parlament Májilisiniń depýtaty boldy, Sport jáne deneshynyqtyrý jónindegi komıtettiń tóraǵasy qyzmetin atqardy. Búgin 40-tyń qyrqasyna shyqqan Serik Jumanǵalıuly ár jyldary «Otan» men «Parasat» ordenderi, basqa da medaldar jáne tósbelgilermen marapattaldy.
