kff_team
«Eýroǵa shyǵý qanshalyqty real biraq? Bıylǵy nátıjelerimiz jaqsy boldy. Jurttyń fýtbolǵa mahabbaty qaıta oıandy. Fýtbolshylarda senimdilik paıda boldy. Tanymal mańyzdy tulǵalar da qoldaı bastady. Endi tek bir qadam qaldy. Slovenııany tek utý kerek. Al olarǵa teń oıyn da jaraıdy. Jeńilip qalsaq, kóktemde Ulttar Lıgasy arqyly taǵy bir shans bolady. Oǵan qaldyrmaı shyqqan jaqsy árıne. Biraq realıst retinde qaraıtyn bolsaq, búgin jeńý qıyn. Slovenııa onsyz da kúshti qurama jáne óz alańynda oınaıdy. ÝEFA prezıdenti Cheferın jáne tóreshi oıyndy buzady degenge senbeımin. Jalpy oıyn boıynsha bylaı da utady olar. Bizdiń fýtbolshylar buryn mundaı fınalǵa shyǵyp kórmedi, júıkeleri syr bereri anyq. Bir qyzyl qaǵaz oıyndy qurtyp ketýi múmkin. Komandanyń lıderleri Zaınýtdınov pen Taǵybergen de joq. Bapker Adıev jigitterdi qaıraı alatyn, rýh bere alatyn jaqsy psıholog sııaqty. Al bylaı taktıkasyna kúmánim bar. Búgin de Aıymbetovty alǵa jiberip, tek dop laqtyryp otyratyn oıyn qurmaıtyn shyǵar dep sengim keledi. Ortany da berip qoısa, bittik. Slovender pressıngpen qysyp tastaıdy. Bizdiń fızıkamyz jetpeýi múmkin. Konsentrasııa máselesi de bar bizdiń qorǵanysta. Fınlıandııa men San-Marınodan bir sáttik qatelerden jibergen edik. Osylaı tolyq berile almaı qalatyn kezderimiz bar. Búgin orta shepti myǵym ustap, olarǵa kómek bere alatyn, júgiretin Samorodovpen bastasa deımin. Iаǵnı, búgin basqa bir taktıkamen oınaýlary kerek, qorǵanysqa bekinip almaı.
Negizi kóbine emosııamen alyp shyqtyq matchtardy, olaı únemi bola bermeıdi. Naqty fýtbol oınaý kerek. Eýroǵa shyqqymyz kelse, Slovenııa sııaqty komandalardy utýyń kerek. Álem chempıonatyna shyǵa almaıtynymyz túsinikti, sondyqtan biz úshin osy týrnır mańyzdy. Jigitter baryn salatyny jáne anyq. Tek tym qatty kútpeı, sabyrmen qaraıyq deımin», dep jazdy IT mamany, belgili sport sarapshysy Arshat Oraz.
Slovenııa – Qazaqstan matchy Lıýblıana qalasyndaǵy «Stojıse park» stadıonynda ótedi. Kelesi jyldyń enshisindegi Eýropa chempıonatyna irikteý týrynda bul eldiń ulttyq quramasy óz alańynda áli jeńilip kórgen joq. Danııa quramasymen ıtjyǵys tústi (1:1), Fınlıandııa fýtbolshylaryn 3:0 esebimen eseńgiretti, Soltústik Irlandııa quramasyn da 4:2 nátıjesimen jeńdi, San-Marıno fýtbolshylaryn qabyldap, 2:0 basymdyǵymen utty.
