Astananyń úlken kınoteatrlarynyń birinde ótken aptalyq aıasynda qala turǵyndary men qonaqtary tarıhı, romantıkalyq jáne shytyrman dramaǵa toly alty úzdik túrik kınotýyndysyn tegin tamashalady. 13 qarashada bastalǵan is-sharanyń shymyldyǵy «Kóbelektiń túsi» atty fılmmen ashyldy. Mádenı merekeniń ashylý rásimine Túrkııanyń Qazaqstandaǵy Tótenshe jáne ókiletti elshisi Mustafa Kapýdjý, Parlament Senatynyń depýtaty Qaırat Tástekeev, Parlament Májilisi depýtaty Abzal Quspan, Ulttyq kitaphana dırektory Ǵazıza Nurǵalıeva, Qoljazbalar jáne sırek kitaptar ulttyq ortalyǵynyń dırektory Jandos Boldyqov, basqa da kınosúıer qaýym qatysty.
Sondaı-aq kórermenge «120», «Uzaq hıkaıa», «Ertuǵyryl 1890», «Sońǵy hat» jáne «Qyzyl oramaldy shynarym» kınokartınalary da oryssha sýbtıtrmen usynyldy. Aıta keteıik, apta aıasynda kórsetilgen fılmder ártúrli janrdan tańdalyp alynǵan.
Jalpy, búgingi tańda túrik kınoındýstrııasy qarqyndy damyp keledi. Tipti Gollıvýd pen Bollıvýdtan keıin eń kóp kartına Túrkııada túsiriletini de ras. Máselen, qazir Túrkııada jyl saıyn 70-ke jýyq fılm túsiriledi.
Qazaq kórermenine usynylǵan alǵashqy fılm – «Kóbelektiń túsi». Rejısseri – Iylmaz Erdoǵan. Basty rólderdi Kyvanch Tatlytýg, Iylmaz Erdoǵan, Mert Fyrat, Belchın Bılgın men Farah Zeınep Abdýllah somdaıdy. Fılmde 1941 jyldary bolǵan oqıǵalar baıandalady.
Aptanyń ekinshi kúninde kórsetilgen «120» fılmi 2008 jyly túsirilgen. Rejısseri – О́zhan Eren. Kınokartına Birinshi dúnıejúzilik soǵys kezinde Vanda bolǵan shynaıy tarıhı oqıǵany sýretteıdi. Al 15 qarashada kórermen qaýym túrik jazýshysy Mustafa Kýtlýnyń shyǵarmasy jelisimen túsirilgen «Uzaq hıkaıa» fılmin tamashalady. Rejısseri – Osman Synav. Apta aıasynda usynylǵan kelesi fılm – «Sońǵy hat». Týyndy 2015 jyly Chanakkale Jeńisiniń 100 jyldyǵyna oraı túsirilgen, mıllıondaǵan kórermen tamashalaǵan, eń úzdik túrik kartınasy retinde tanymal. Rejısseri – О́zhan Eren.
Iýnýs Emre atyndaǵy túrik mádenıet ortalyǵy dırektorynyń mindetin atqarýshy Almagúl Isına atalǵan is-sharanyń ultaralyq baılanysta qandaı mańyzǵa ıe bolǵanyn atap ótti.
«Bıyl Túrkııa Respýblıkasynyń qurylǵanyna 100 jyl toldy. Osy ataýly dataǵa arnaıy «Sońǵy hat» jáne «120» atty kınotýyndylar kórsetildi. Kórermen, ásirese «Uzaq hıkaıa» fılminen qatty áser aldy. О́ıtkeni kınoda kópshilikke jaqsy tanys akter Kenan Imırzalyoǵly basty róldi oınaǵan bolatyn. Aptalyqqa elorda turǵyndary úlken yqylas bildirdi.
Alty kún boıy kórsetilgen kıno aptalyǵynda myńnan asa kórermen túrik kartınalaryn keń ekranda kórdi. Zalda ıne shanshar jer bolmady, bul da Túrkııa men Qazaqstan arasyndaǵy baýyrlastyqtyń, syılastyqtyń, etene jaqyndyqtyń kórinisi deýge bolady», deıdi.
Sondaı-aq ol qazaq kórermeni túbi bir týys el Túrkııanyń kınokartınalaryn jyly qabyldaıtynyn, baýyrlas eldiń bir-birin jaqynnan tanı túsýine kıno salasynyń qosatyn róli úlken ekenin aıtty. Túrik halqynyń tarıhynda erekshe oryn alǵan ataýly oqıǵalary, salt-dástúri, mádenıeti men mýzykasy fılmderde ádemi kórinis tapqan.
Mádenı is-sharanyń sońǵy kúni kópke málim Shyńǵys Aıtmatovtyń «Shynarym meniń, shyraılym meniń» povesine Alı О́zgentúrk jazǵan ssenarıı boıynsha rejısser Atyf Iylmaz túsirgen kınosy kórsetildi. Basty róldi tanymal túrik aktrısasy Túrkan Shoraı somdaǵan. «Ieshılcham» túrik fılm stýdııasy 1978 jyly túsirgen klassıkalyq kartına kórermenge erekshe unaǵanyn da aıta keteıik. Eske salsaq, álemde atalǵan shyǵarmanyń jelisimen túrli fılmder men spektaklder qoıyldy. Bul kıno da lırıkalyq sarynyn joǵaltpaǵan keń tynysty týyndyǵa aınala alǵanyn kórdik.
