Aqynnyń alǵashqy portretiniń biri ekinshi jınaǵy «Taspıq» jaryq kórgen ýaqytta salyndy. Bul 1914 jyl bolatyn. Natan Altmannyń «Onyń aqyn dostary biletin beınesi» atty portretinde ol tákappar jáne álsiz bolyp beınelengen. Altmanmen bir mezgilde Ahmatovany Olga Della-Vos-Kardovskaıa da saldy. Sýretshiniń qyzy Ekaterına óz esteliginde osy eki kartınany salystyrady: «Kórkemóner turǵysynan alǵanda, meniń anam salǵan portret ózime qansha unasa da, aqyn dostary men tabynýshylary biletin Ahmatova bul portrette emes, Altmannyń týyndysynda dál berilgen dep sanaımyn».
Aqyn avangardtyq portret pen Natan Altman týraly «Qasıetti otannyń toǵaıyn tastap ketkende» óleńinde jazady.
Ahatovanyń endigi ataqty portreti – «Muńdy sulý». 1921 jyly Ahmatova Petrogradta, kúıeýi Vladımır Shıleıkomen (olar 1918 jyly, Ahmatova men Gýmılev ajyrasqan jyly úılendi) turyp jatty. Aqynnyń dostary Borıs Anrep pen Olga Glebova-Sýdeıkına shetelge qonys aýdarǵan bolatyn. Al Ahmatova keńestik Reseıde qalyp, oryn alǵan ózgerister men jaqyn adamdarymen aıyrylysýdyń aýyr kezeńin bastan keship júrdi.
Petrogradtaǵy Kırochnaıa kóshesindegi úıde onyń sýretin Iýrıı Annenkov saldy. Ol Ahmatovany aýyr oılardan aryltýǵa bar kúshin salyp baqty: «Momyn tutqyndaı kórinetin muńdy sulý, ásem aqsúıekshe sándi kóılek jasanǵan! …Ahmatova maǵan sýretin asqan shydammen, sol qolyn keýdesine qoıyp turyp saldyrdy. Seans kezinde biz beıtarap taqyryptarǵa suhbattasyp, maıda-shúıdeni áńgime qyldyq».
Bul kartınadan keıin birneshe jyl óter-ótpeste Ahmatovanyń shyǵarmalaryn jarııalaý múldem doǵarylǵan edi. «Máskeýdegi keshterimnen soń (1924 jyldyń kóktemi) meniń ádebı qyzmetimdi toqtatý týraly qaýly shyqty. Meni jýrnaldar men almanahtarǵa jarııalamady, ádebı keshterge shaqyrýdy qoıdy», dep jazdy aqyn.
Osy kezeńde sýretshi Nıkolaı Tyrsa erekshe materıaldar – akvarel men kerosın shamy kúıesiniń qospasyn paıdalanyp, Ahmatovanyń úsh portretin saldy. Sýretshiniń bul týyndylary Osıp Mandelshtamǵa erekshe áser qaldyrdy. Mundaǵy aqynnyń kóńil kúıi portrettegi boıaýlardan-aq anyq kórinip tur.
Budan keıingi salynǵan portretter de aqynnyń ómiri men shyǵarmashylyǵyndaǵy súreńsiz jyldarda salyndy. Osmıorkınniń «Aq kóılekpen aq túnde», Sarıannyń «Ideıadan jurdaı bos poezııa ókili» portretteri sol kezeńniń qanyq boıaýyn bergendeı.
1964 jyl. Ahmatovany qaıta jarııalaı bastady, Keńes Jazýshylar odaǵyndaǵy músheligin qalpyna keltirdi. Aqyn Italııada «Etna-Taormına» ádebı syılyǵyn ıelendi. Onyń uly aqtalyp, 1956 jyly bosap shyqty.
Sol jyly Moıseı Lıangleben Ahmatovanyń eń sońǵy portretteriniń birin saldy (ol 1966 jyly ómirden ótti). Sýretshi ony natýradan bes ret salyp, Ahmatova sol portretterdiń tórteýinde óz qoltańbasyn qaldyrǵan. Demek, unaǵany ǵoı.
Bul múldem basqa Ahmatovanyń portretteri bolatyn. Sýretshi ári jazýshy Iýzef Chapskııdiń esteligine súıensek, munda Anna Andreevna úlken kresloǵa jaıǵasqan, iri, baıypty, tolyq, sál sańyraýlyǵy bar. Olar XVIII ǵasyrdaǵy orys patshaıymdarynyń minsiz portretterin eriksiz eske túsiredi. Týyndynyń «Orys patshaıymy» dep atalýy da sodan shyǵar.
