Álemdegi eń qymbat sýretshiniń kartınalary áli de ataǵyn aıǵa jetkizip, aýksıondarda sumdyq aqshaǵa satylyp jatyr. Eske salsaq, 2015 jyly kóktemde Nıý-Iorkte onyń «Aljır áıelderi» týyndysy 179 mıllıon dollarǵa baǵalanyp, Pablonyń shyǵarmashylyǵyn súıetin bir jannyń qolynda kete bardy. Sondaı-aq 2008 jyly Pıkasso týyndylarynyń óner naryǵyndaǵy baǵa ındeksi 262 mıllıon dollardy qurady.
Al jýyrda ǵana «Financial Times» basylymy Pıkassonyń taǵy bir kartınasy rekordtyq baǵamen satylǵanyn jazdy. «Montredegi áıel» kartınasy Nıý-Iorktegi Sotheby's aýksıonynda 139,4 mıllıon dollarǵa satyldy. Osy tusta ónerdiń shyn baǵasy sheksiz ekenine kúmániń qalmaıdy. Pablonyń osy ýaqytqa deıin satylǵan ekinshi qymbat týyndysy «Saǵat ustaǵan áıel» degen ataýmen de belgili.
1932 jyly maıly boıaýmen kenepte salǵan týyndyda ıspandyq sýretshi óziniń súıiktisi jáne mýzasy Marı-Tereza Valterdi beınelegen. Iá, Pablonyń ómirde mýzalary kóp boldy. Árıne, sýretshiniń birneshe mahabbat hıkaıasy eshkimge jańalyq emes. Osy oraıda Marsel Ýmber esimi ónertanýshylarǵa tańsyq emes. Laqap aty – Eva. Pıkasso Evany shyn súıdi, mýzasy sanady desedi. Tipti Eva beınelengen kartınasyn «Jalańash áıel, Eva, men seni súıem!» dep ataǵan. Alaıda Evamen sýretshiniń baqytty ómiri uzaqqa sozylǵan joq. Erke Eva aýyr dertten kóz jumady. Al bıshi Olga Hohlovamen bas qosyp, uly dúnıege kelgende sýretshi shyǵarmashylyǵynda bir ózgeris baıqaldy. Kartınalarynda kúńgirt boıaý azaıyp, jaryq pen jylylyq kórine bastady.
Al rekordtyq kartınanyń keıipkeri – Marııa Valter esimdi boıjetkenniń Pıkasso ómirine qatysy az emes. Marııa sýretshiniń kóptegen kartınasynyń «keıipkerine» aınaldy. «Aına», «Aına aldyndaǵy qyz» kartınalarynyń keıipkeri – dál osy Marııa. Pıkasso qabiriniń janyna qoıylǵan «Qumyra ustaǵan áıel» músininde beınelengen áıel de – Marııa.
Marııadan keıin Fransýaza («Áıel-gúl» kartınasy Fransýazaǵa arnalǵan), odan soń Jaklın Rok. О́miriniń sońǵy jyldarynda avtor negizinen osy Jaklınniń sýretin salady.
Pablo qolyna qylqalamyn alǵash alǵan sátten bastap, qoshemetke bólenip, qaltasy aqshaǵa tola qoıǵan joq. О́tpeli bir kezeńderde ol da sýretin satyp, tegin tamaq ishti. Oǵan ylǵı juldyzy janý úshin tek Parıj jetpeı turǵandaı kórinetin. Parıjge barsa, elge tanylyp, baıyp ketetindeı sezinetin. Barselona dámhanalarynda iship otyryp, Parıj týraly jıi aıtatyn. Sóıtip júrip Pablo Parıjge de jetti. Eńseni basqan bir muńnan arylǵandaı erkin ómir súrdi. Tapqan tabysyn áıelderge shashyp, tipti keıde nan alýǵa aqshasy bolmaıtyn. Pıkassony Parıjde eshkim mensingen joq. Kartınalary da ótpedi. Dosy Kasagemastyń óliminen soń Pablo túbegeıli ózgerdi: zııandy ádetterinen bas tartyp, tańnan keshke deıin tek sýret sala berdi. Kartına satýmen aınalysatyn kópes Vollar sýretshiniń jolyn ashty. Pıkassonyń týyndylaryn unatqan ol kórme uıymdastyryp, kartınalaryn satyp, jap-jaqsy tabys tapty.
Sýretshiniń kýbızm stılimen kóp jumys istegenin bilemiz. Ol eń alǵash bul janrda «Avınon qyzdaryn» saldy. Munda jalańash jeńil júristi qyzdardy beıneledi. Jalańash áıeldi salý jańalyq pa? Árıne, joq. Pıkasso áıelderiniń keıbiriniń basy jan-janýardyń basyna uqsaıtyn. Sýret ónerindegi bul erekshelikti árkim árqalaı qabyldady. Tipti kóbisi shoshydy.
Alǵashynda Sotheby's «Montredegi áıeldi» 120 mıllıon dollarǵa baǵalaǵan. Buǵan deıin kartına 102 jasynda qaıtys bolǵan mesenat Emılı Fısher Landaýdyń kolleksııasynan alynǵan.
