Aýtızm dertine dýshar bolǵan balalarǵa buǵan deıin de kómek kórsetilip kelgen. Derekke júginsek, jańa ortalyqta 1,5-18 jas aralyǵyndaǵy 125 bala óz isiniń sheberi sanalatyn mamandar tarapynan tegin kómek almaq. Sondaı-aq olardyń ata-analaryna da túrli deńgeıde qoldaý kórsetý jaǵy qarastyrylǵan.
Ortalyqtyń ashylý saltanatyna óńir basshysy Erbol Qarashókeev, «Qazaqstan halqyna» qoǵamdyq qorynyń basqarma tóraǵasy Bolat Jámishev, «Samuryq-Qazyna» qory korporatıvtik basqarý, áleýmettik-eńbek qatynastary jónindegi basqarýshy dırektory Ǵıbrat Aýǵanov, «Qamqorlyq» korporatıvtik qorynyń dırektory Araılym Erkinova qatysty.
«Bılik tarapynan balalarǵa, qarııalarǵa, sondaı-aq múmkindigi shekteýli azamattarǵa qoldan kelgenshe qoldaý kórsetilip jatyr. Olarǵa qoǵamda teń jaǵdaı qalyptastyrý úshin jergilikti atqarýshy bılik te múmkindiginshe jumys atqaryp keldi. Balalarǵa qamqorlyq jasaý – memlekettiń de, azamattardyń da asyl boryshy ekeni daýsyz. Sondyqtan biz bul máselege basymdyq berip otyrmyz. Prezıdent tapsyrmasyna sáıkes óńirde múmkindigi shekteýli jandarǵa kómek kórsetý maqsatynda biraz tirlik tyndyrylǵanyn aıta ketken lázim. Jalpy, oblysta 45 myńnan asa múgedektigi bar azamat tirkelgen. Olardy qoldaý maqsatynda 3,5 mlrd qarjy qarastyrylǵan. Bul baǵyttaǵy jumystar aldaǵy ýaqytta da jalǵasady», dedi E.Qarashókeev.
Is-shara barysynda sóz alǵan «Qazaqstan halqyna» qoǵamdyq qorynyń basqarma tóraǵasy Bolat Jámishev, «Samuryq-Qazyna» qory korporatıvtik basqarý, áleýmettik-eńbek qatynastary jónindegi basqarýshy dırektory Ǵıbrat Aýǵanov, «Qamqorlyq» korporatıvtik qorynyń dırektory Araılym Erkinova aýtızm dertine shaldyqqan balalardyń tolyqqandy saýyǵýy úshin ortalyq mamandary jáne qoǵamnyń qoldaýy aýadaı qajet ekenin atap ótti. О́z kezeginde óńir basshysy E.Qarashókeev ortalyqtyń ashylýyna muryndyq bolǵan barlyq tarapqa alǵysyn bildirdi.
Jańa ortalyqta logoped, defektolog sekildi ózge de mamandar jumys isteıdi. Olar erekshe balalarǵa ava-terapııa, mýzykalyq terapııa, sensorlyq ıntegrasııa, ergoterapııa, kınezıoterapııa, beıimdelgen jáne emdik dene shynyqtyrý, eńbek terapııasy, art-terapııa, áleýmettik-turmystyq baǵdarlaý boıynsha sabaqtar ótedi eken. Mamandar ár balanyń qabileti men qajettiligine sáıkes ádiskerler arnaıy ázirlegen baǵdarlamalar boıynsha jumys júrgizedi.
Ortalyq dırektory Rashıda Karımova jańa nysannyń 125 balaǵa arnalǵanyn aıtyp otyr. Onyń sózine sensek, ortalyqta aýtızmi bar balalardy emdeýge qajetti barlyq jabdyq bar.
«Bizdiń ortalyqta 30-ǵa jeteǵabyl túrli kabınet bar. Mundaǵy kabınettiń barlyǵy qajetti jabdyqtarmen jabdyqtalǵanyn aıta ketken jón. Bir sózben aıtqanda, balalardy saýyqtyrýǵa qoldan kelgenshe jaǵdaı qarastyrylǵany qýantady. Ortalyq qyzmetkerleri óz qyzmetin medısınalyq-áleýmettik saraptamanyń qorytyndysy negizinde jáne ońaltýdyń jeke baǵdarlamasyna sáıkes atqarady. Jambyldyqtar uzaq ýaqyt kútken ortalyqtaǵy mamandar erekshe balalarǵa qoldan kelgen kómegin kórsetýge ázir», deıdi R.Karımova.
Jambyl oblysy
