Sport • 13 Jeltoqsan, 2023

Rıngte – chempıondar!

170 ret

kórsetildi

3 mın

oqý úshin

15 jeltoqsanda Astanadaǵy Beeline Arena kesheninde kásipqoı bokstan «IBA-nyń chempıondar túni» dep atalatyn halyqaralyq týrnır ótedi. Bul jarysta qazaqtyń jýan judyryqty jigitterimen qatar, alys-jaqyn shet memleketterden kelgen birqatar tanymal bylǵary qolǵap sheberleri óner kórsetedi.

Ǵalym SÚLEIMEN

Elordadaǵy boks keshiniń basty jekpe-jeginde Danııar Eleýsinov kúsh synasady. 32 jastaǵy saqa sportshy kezinde Rıo Olımpıdasynyń jeńimpazy (2016 jyly), álem chempıony (2013), álem chempıonatynyń kúmis júldegeri (2015), Azııa oıyndary (2010, 2014) men qurlyq birinshiliginiń (2016, 2015) eki dúrkin jeńimpazy atandy. Bul belesterdi ol 64 jáne 69 kg salmaq dárejelerinde baq synaǵan kezinde baǵyndyrdy. 2018 jyly kásipqoılar arasynda judyryqtasýǵa bel býdy. Sol ýaqyt aralyǵynda 11 kezdesý ótkizip, barlyǵynda mereıi ústem boldy. Alty aıqasta aıqyn basymdyq tanytty. Sońǵy ret Danııar osydan eki jyl buryn Astanada argentınalyq Hýan Ernan Lealdan aılasyn asyryp, jartylaı orta salmaqta IBO nusqasy boıynsha chempıondyq ataqty ıelendi.

aro

Danııardyń sporttyq karerasynda keleńsiz jaǵdaılar da az bolǵan joq. Uzaq ýaqyt boıy rıngke shyqpaǵany úshin ol óz ataǵynan aıyryldy. Sonymen qatar qarjy máselesi boıynsha túsinispeýshilik paıda bolyp, qandasymyz Boxing Start Llc promoýterlik kompanııasynyń menedjeleri Zııa Alıev, Elvıs Krespo jáne Djo Kıambomen sottasty. Sóıtip, júrip qazaqtyń daryndy boksshysy altyn ýaqytynyń birazyn zaıa ketirdi.

Eki jylǵa sozylǵan úzilisten keıin Eleýsinov sharshy alańǵa qaıta oralady. 15 jeltoqsanda ol Djabýlanı Makkenzemen kúsh synasady. 30 jastaǵy Ońtústik Afrıka Respýblıkasynyń (OAR) ókili 2016 jyldan beri kásipqoı rıngte óner kórsetip júr. Sol kezden beri 16 márte jekpe-jekke shyǵyp, 14 ret jeńiske jetti. Sol aıqastarynyń teń jartysynda qarsylastaryn nokaýtqa jiberdi. Ol tek óziniń otandasy Týlanı Mbende men reseılik Vıtalıı Petrıakovtan ǵana utyldy.

Astanadaǵy boks keshinde Danııar Eleýsinovten bólek, ár jyldary álem chempıonattarynda atoı salǵan Bekzad Nurdáýletov (6-0, 2 KO) reseılik Nıkıta Zonmen (7-0-1), Aslanbek Shymbergenov meksıkalyq Hose Mıgel Borregomen (20-4, 17 KO), Mahmýd Sabyrhan kýbalyq Osvaldo Dıaspen, Sanjar Táshenbaı ózbekstandyq Nodırjon Myrzaahmedovpen, Dýlat Bekbaýov reseılik Harıton Agrabamen (12-0) jáne Serik Temirjanov serbııalyq Pavel Fedorovpen judyryqtasady. Jastar arasyndaǵy Azııa birinshiliginiń kúmis júldegeri Erasyl Jaqpekov nıderlandtyq Gradýs Kraýspen qolǵap túıistiredi. Bulardyń barlyǵy da úsh mınýttan alty raýndqa sozylatyn saıystar.