Foto: TJM
Muz ústinde balyq aýlarda ózińmen birge ne alyp júrý kerek?
Qalyńdyǵy 25 santımetrden kem muzǵa shyqqan kezde balyqshy ózimen birge ysqyryq, qutqarý jıleti, qutqarý ilgekteri, uzyndyǵy keminde 12 metr, dıametri keminde 11 mm arqan, uzyndyǵy keminde 2 metr taıaq, sý ótkizbeıtin paketke salynǵan uıaly telefon bolýy qajet.
Muz betinde turǵan kezde muz jarylyp ketse qolyńyzda uzyndyǵy 2 metrden kem emes taıaq bolsa, soǵan súıenip shyǵýǵa bolady.
Qutqarý ilgekteri moıynǵa taǵylady. Qulaǵan kezde qutqarý ilgekteri muzdan ońaı shyǵýǵa múmkindik beredi. Balyqshylardyń kóbi bul quraldy elemeıdi. Olar kóbinde pyshaqqa senedi. О́kinishke qaraı, kóp jaǵdaıda pyshaqtyń kómegi bola bermeıdi.
Arqan. Qys mezgilinde balyqshylarǵa berik arqan mindetti túrde kerek. Ol qıyndyqqa tap bolǵan basqa balyqshylardy qutqarý úshin qajet bolady.
Ysqyryq. Oqys oqıǵaǵa tap bolǵan adamnyń qandaǵy adrenalın deńgeıi joǵarylap shok alýy múmkin. Mundaı jaǵdaıda adam qatty aıqaılap, kómekke shaqyra almaýy múmkin. Qatty ysqyryq basqalardyń nazaryn aýdarýǵa kómektesedi. Ony qoljetimdi jerde ustańyz.
Baılanys quraldary. Qutqarýshylardy shaqyrý úshin telefon qajet bolady. Telefondy sý ótkizbeıtin jaǵdaıda ustańyz.
Qutqarý keýdeshesi sýǵa batyp ketpeýge kómektesedi.
Muz ústinde bolǵan kezdegi keńester:
- muzda jalǵyz júrmeýge tyrysyńyz, dostaryńyzben birge júrińiz nemese basqa balyqshylardyń shoǵyryna jaqyn bolyńyz;
- tótenshe jaǵdaıda alystan kóriný úshin ashyq jáne túrli tústi kıimderdi kıińiz;
- kıimderdi qabat-qabat kıińiz. Ylǵaldanǵan jaǵdaıda syrtqy qabat kıimderdi tez syǵyp, qarǵa súrtýge bolady, ol sýdy tez sińiredi.
- muzda júrgende qasyńyzdaǵy adamdarmen araqashyqtyqty saqtańyz.
- muzǵa avtokólikpen shyǵý qaýipti. Muzǵa tek arnaıy jabdyqtalǵan ótkelder arqyly shyǵýǵa bolady.
- tótenshe jaǵdaı kezinde 112 nómirine habarlasý qajet.
