Foto: Ashyq derekóz
– Sofııa Rotarýmen sol konkýrsqa barǵanda tanystyńyz ǵoı?
– Iá, oǵan deıin ne aýdandyq, oblystyq, qalalyq konkýrstyń birine de qatyspaǵan basym, Máskeýden bir-aq shyǵaıyn. О́zaǵam, О́zbekáli Jánibekovtiń tabandylyǵy men eren erlikke para-par qaıratkerliginiń nátıjesi ǵoı. Máskeýde daıyndyq kezinde Molodovadan kelgen Sofııa Rotarý, Reseıden opera ánshisi Tamara Sınıavskaıa jáne taǵy bir qyz tórteýmiz bir bólmede jattyq. Bir kúni tún ortasy aýǵanda esigimizdi qaqty, ashsaq meni izdep kelipti. О́zin tanystyryp «erteńgi óner baıqaýynda sen bılemeıtin boldyń, ornyńa О́zbekstannan kelgen bıshi shyǵady, saıys ótetin saraıǵa kelmeseń de bolady» dep ketip qaldy. Konkýrstyń sharty boıynsha qatysýshylardyń irikteýden ótip, fınaldyq týrǵa jetkenderi keshigip qalsa, ıa bolmasa aýyrsa, birden syzylady, ornyna basqa ónerpaz jiberiledi. Al mende bári jaqsy, daıyndyǵym da joǵary. Eshqandaı sebepsiz jolym bógelmek. Etegim jasqa tola jyladym. Sofııa Rotarý bilegimnen tas qyp ustady da: «Kim seniń elińnen jaýapty? Júr, sol kisige baramyz», – dep jataqhanadan shyǵyp, jarym túnde Máskeýdiń kóshesinde jaıaý Jánibek aǵa toqtaǵan qonaqúıge qaraı tarttyq. Sofııa maǵan qaraǵanda qala kórgen, buǵan deıin de talaı konkýrstyń otyna da, sýyna da túsip ysylǵan ǵoı. Al men aýyldyń uıań qyzymyn, «bári bitti, osymen jolym kesildi» dep ýaıymǵa salynyp ilesip kelem. Ár respýblıkanyń komsomol hatshylary toqtaǵan qonaqúıde tynyǵyp jatqan О́zbekáli Jánibekovtiń esigin qaqtyq. Bizdiń qobaljyǵan túrimizdi kórip shoshyp ketti. Men kóz jasymdy kóldete bolǵan jaıtty kómeıime óksik tyǵylyp ázer jetkizdim. Aǵanyń túri buzylyp, qany basyna shaýyp shyǵa keldi. «Qane kettik, men olarǵa kórseteıin» dep úsheýmiz BLKJO Ortalyq Komıtetiniń birinshi hatshysy Evgenıı Tıajelnıkovtiń bólmesine bardyq. Biz Sofııa ekeýmiz esik aýzynda qaldyq ta, Jánibek aǵa Evgenıı ekeýi arǵy bólmede sóılesti, daýystary údep barady. О́zbekáli aǵa ár sóılegen saıyn tars-tars etip stoldy urǵany da estilip turdy. Kóp uzaǵan joq qaıta shyqty da: «Sen alańdamaı demala ber, erteń bıleısiń, ónerińdi kórsetesiń, eshkim kedergi bolmaıdy», – dep kóńilimdi basty. E.Tıajelnıkov te qamqorlyq tanytyp, eshkim tosqaýyl bolmaıtynyn, meniń bıleıtinimdi aıtty. Bólmemizge kelgen soń qaıdan uıqy kelsin, tań atqansha dóńbekship shyqtym. Eger sol kezde Sofııa Rotarý batyldyq tanytpasa, meniń konkýrsqa qatyspaı qalýym da bek múmkin edi.
– Konkýrsta bıledińiz ǵoı.
– Iá ónerimdi kórsetip, kúmis medal ıelendim. «Aıjan qyz» bıin bar ónerimdi sala bıledim. Sahnalyq kıimimdi О́zbekáli aǵa qoly ismer men degen sheberlerge tiktirip berdi. Sofııa Rotarý estrada janry boıynsha jeńimpaz atandy, Tamara Sınıavskaıa operadan jeńimpaz boldy. Jańa aıtqanymdaı, buǵan deıin ne aýdandyq konkýrsqa qatyspaǵan Talpaqovanyń dańqy birden dúrkirep ala jóneldi. Búkil odaqqa taraıtyn «Ogonek» jýrnalynyń muqabasyna meniń sýretim basyldy. Aýǵanstannyń jýrnalyna da shyǵardy, basqa da elderdiń baspasózi qazaqtyń bıshi qyzy Gúljan Talpaqova týraly jarysa jazdy. О́kinishtisi, páterimiz órtengende arhıvimdegi kóptegen qundy jádigerler janyp ketti.
Meniń juldyzymnyń jarqyraýyna О́zbekáli aǵa osylaı eńbek sińirip, jolymdy ashty. Konkýrstan kúmis júlde alǵannan keıin dańqym da dúrkiredi. 31 jasqa shyqqanymda Qazaqstannyń halyq artısi ataǵy berildi.
– Sofııa Rotarýmen sol konkýrstan keıin de baılanysyp turdyńyz ba, qazir hat-habar almasasyz ba?
– Qurby atanyp aralastyǵymyz bertinge deıin jalǵasty. Sońǵy ret Almatyǵa konsert qoıyp kelgende júzdestik, odan keıin jolymyz túıispedi. Eki ret gastroldik saparmen kelgende Respýblıka saraıyndaǵy konsertin tamashaladyq. Úıge shaqyryp qonaq ettik. Búgingi kúnde jasyratyny joq, telefonmen de sóılesýdiń qısyny kelmeı ketti. Qazir endi «baıtal túgil bas qaıǵy», densaýlyǵym syr berip, aýrýhananyń esigin jıi ashatyn boldym.
Osydan 55 jyl buryn ótken osy konkýrsta Armenııanyń halyq ártisi Leonıd Engıbarov, baletmeıster Nıkolaı Baryshnıkov syndy tulǵalarmen de tanysyp dámdes bolǵanyma táýbe deımin. Qazaqtyń bı óneriniń órleýine perzenttik úlesimdi qosqanyma maqtanamyn.
