Pavlodar oblysyndaǵy joldardy qalypty jaǵdaıda ustaýǵa qazynadan bıyl 3,4 mlrd teńge bólingen. Bul somanyń esebinen avtokólik joldaryn tazalaý, tehnıkalardy jalǵa alý, jazda jáne qysta kútip ustaý qarastyrylǵan. О́ńirlik jol qyzmetinde qazirgi kúni 96 azamattyq qorǵanys qurylymy, 798 qyzmetker, 218 ınjenerlik jáne 116 avtokólik tehnıkasy, 1 jol-kópir brıgadasy, 18 jol toby bar. Respýblıkalyq mańyzǵa ıe joldardyń jalpy uzyndyǵy 1 663 shaqyrymdy qurasa, onyń 1 473 shaqyrymyna merdiger kompanııa «QAJservıs» JShS qyzmet kórsetedi. Al Pavlodar – Astana avtojolynyń aqyly bóligin (191 shaqyrym) kútip ustaýǵa «Iаssy Qurylys» JShS jaýaptanǵan. «QAJservıstiń» jergilikti fılıalynda 94 menshikti tehnıkasy bar. Olardyń qysqa daıyndyǵy 100 paıyz delinip otyr. Sonymen birge 13 óndiristik baza men 10 jylytý pýnkti daıarlanyp qoıǵan.
«QazAvtoJol» AQ óńirlik fılıaly dırektorynyń orynbasary Alekseı Logvınenkonyń aıtýynsha, pavlodarlyq mekeme ótken qysta joldardy normatıvti tazalaý ýaqytyn qysqartý maqsatynda bes birdeı qurama jol mashınasy men alty arnaıy tıegish traktor jalǵa alǵan. Al bıyl 21 tehnıka satyp alynypty. Jyl sońyna deıin taǵy 10 qurama mashına jetkiziledi dep josparlanǵan.
«Iаssy Qurylys» fırmasynyń ókilderi 35 arnaıy tehnıkamyz bar, Pavlodar – Astana avtobanynyń ózimizge tıesili bóligin qardan ýaqtyly tazalap turýǵa tolyq daıynbyz dep bilek sybanyp otyr. Bul aýmaqta da óndiristik bazalar men 2 jylytý pýnkti daıyn. Kásiporyn qosymsha tórt qurama jol mashınasyn jáne bir shnekorotordy jalǵa alý týraly shartqa otyryp qoıǵan. Jolǵa qyzmet kórsetetin uıymdar qysqy ýaqytqa 15 myń tekshe metr qum, 1 700 tekshe metr sepkish materıal men 4 300 tonna tuzdy qoımalarda saqtap otyr. Buǵan qosa rezervte kóktaıǵaqqa qarsy 75 tonna reagent bar.
О́ńirlik tótenshe jaǵdaılar departamenti tótenshe jaǵdaılardy joıý basqarmasynyń bastyǵy Aqylbek Baıahmetov óńirdegi avtojoldarda qar basyp qalatyn ýchaskelerdiń sany bıyl aıtarlyqtaı azaıǵanyn aıtady. Iаǵnı byltyr álgindeı qaýipti jol bólikteriniń sany – 257 bolsa, bıyl olar 215-ke deıin tómendegen.
«Pavlodar oblysyndaǵy joldar boıynda buǵan deıin 44,33 shaqyrym qar ustaıtyn qalqandar bolsa, bıyl ol taǵy 3 shaqyrymǵa uzardy. Respýblıkalyq joldardyń boıynda kóbine temirbetondy qalqandar turǵanyn kórgen bolarsyzdar. Oblystyq jáne aýdandyq joldardyń boıynda jyljymaly aǵash qurastyrmalar qalqan retinde paıdalanylady. Pavlodar – Astana jolyndaǵy búıir qorshaýlar qysta qar baspaýy úshin alynyp tastaldy. Al beldeý qorshaýlary qaldyryldy. Sebebi jolda keıbir avtokólikterdiń dóńgelekteri qysqa saı bolmaı, qarsy jolaqqa shyǵyp ketip, jol-kólik oqıǵalaryn týdyratyny málim. Jergilikti joldardyń boıyndaǵy butalar da tazartyldy. Osyndaı is-sharalardyń nátıjesinde qar ustaýy yqtımal ýchaskeler barynsha azaıyp otyr», deıdi A.Baıahmetov.
Mamannyń sózinshe, bıylǵy qystyń erekshe jyly bolyp turýy aldaǵy kóktemde birqatar qaýip-qaterge soqtyrýy múmkin. Kúnniń birese kúrt jylynyp nemese qatty aıaz turýynan topyraq qabaty birkelki tońdanbaıdy. Saldarynan jerde muz qabattary paıda bolyp, jazǵyturym qar birkelki erimeıdi. Sáıkesinshe, ózen sýlary erte kóktemde tasyp, sý tasqyny jıi bolatyn aýmaqtarda qaýipti jaǵdaı qalyptasýy yqtımal. Toń bolyp qalǵan topyraq qabaty jibigenshe biraz ýaqyt kerek. Onyń ústine qazirgi kúni oblysta turaqty qar jamylǵysy múlde joq deýge bolady. Atalǵan faktorlardyń barlyǵy kóktemde jaǵdaıdy ýshyqtyratyny anyq.
Pavlodar oblysy
