Qańtar aıynda Petropavl turǵynyna ózi almaǵan iri somadaǵy nesıeni tóleý týraly habarlamalar kele bastaǵan. Muny kórgen áıel dereý polısııa basqarmasyna júgingen. Nesıeni kim alýy múmkin ekeni týraly esh boljam bolmaǵan. Jedel ýákilder túrli suraqtar qoıǵan kezde, onyń esine 16 jastaǵy uly ótken jyldyń jeltoqsan aıynda saıttardyń birinde tirkelýdi ótingeni, sol arqyly emtıhan jaýaptaryn alýǵa bolady dep ótinish bildirgeni esine tústi. Jasóspirim saıtta eki adamdy tirkelse naqty baǵasy jeńildetiledi degen usynys bolady dep anasyn aldap soqqan.
Al tirkeý prosedýrasynda adamnyń foto jáne beıneverıfıkasııadan ótýi qajet bolǵan. Aldanǵanyn túsinbegen áıel «basty solǵa, ońǵa burý» degen sııaqty avtomatty bottyń talaptaryn oryndap shyqqan.
«Osy prosedýra arqyly jábirlenýshiniń atyna 1 mıllıon 180 myń teńge kólemindegi nesıe resimdelgeni anyqtaldy. Atalǵan fakti QR Qylmystyq kodeksiniń 190-babynyń 2-bóligi (Alaıaqtyq) boıynsha Sotqa deıingi tergep-tekserýlerdiń biryńǵaı tizilimine engizildi. Qazirgi ýaqytta tergeý aıaqtalýǵa jaqyn, tergeýshiler is materıaldaryn sotqa jiberýge daıyndalyp jatyr», dedi SQO PD krımınaldyq polısııa basqarmasynyń bastyǵy Ivan Terzıdı.
