Is-sharanyń maqsaty – qazaq qyzdarynyń boıyndaǵy ınabattylyq, ádeptilik, ádemilik, kishipeıildilik sekildi asyl qasıetterdi dáripteý. Baıqaýǵa bas qaladaǵy kolledjderde oqıtyn aqyldary kórkine saı 12 burymdy arý qatysty. Olar án aıtyp, bı bılep, qoıylym kórsetip, kórermenderdi óz ónerlerimen tánti etti. Saıysqa Qazaqstannyń eńbek sińirgen qaıratkeri Sáýle Meshitbaıqyzy, ardager ustaz Qajymurat Násıuly, elordalyq Áıelder isteri jáne otbasylyq demografııalyq saıasat jónindegi komıssııa hatshysy Qarlyǵash Sarkenova bastaǵan belgili tulǵalar qazylyq jasady.
Sonymen ulttyq qundylyqty dáriptegen baıqaýdyń bas júldesin L.N.Gýmılev atyndaǵy Eýrazııa ulttyq ýnıversıteti kolledjiniń stýdenti Aıdana Tileýjan jeńip aldy. Oǵan ataqty zerger Berik Álibaıdyń shákirti ári uly Zııat Berikulynyń qolynan shyqqan taza kúmisten qaqtalyp soǵylǵan shashbaý tabys etildi. Al birinshi oryndy «Astana Profı» qalalyq sharýashylyq kolledjiniń stýdenti Zere Rústemqyzy ıelendi. Bul arýǵa da Zııat zerger jasaǵan qońyraý syrǵa men qus tumsyq júzik berildi. Ekinshi oryn Servıs jáne týrızm kolledjiniń stýdenti Anısa Qurmasheva men Tehnıkalyq kolledjdiń stýdenti Aqbota Balabaıǵa buıyrdy. Úshinshi oryndy «Ýrban» kolledjiniń stýdenti Raýan Rýslanqyzy, «Astana polıteh» joǵary kolledjiniń stýdenti Aıagóz Nabıǵat jáne Joǵary kólik jáne kommýnıkasııa kolledjiniń stýdenti Orynbasar Rahımova ózara bólisti. Sondaı-aq Z.Myrzaǵulova atyndaǵy «Danalyq» joǵary medısınalyq kolledjiniń stýdenti Qaraqat Pirnııazova «Kórermen kózaıymy» atalymyna ıe boldy. Júldegerlerdiń bári de baǵaly syılyqtarmen marapattaldy.
