Qarly boran qutyryp, jol ústin qoıý tuman basyp qalǵandyqtan, óńirde respýblıkalyq mańyzy bar 7, oblystyq mańyzǵa ıe 23 avtokólik joly jabyldy. Al mektepter qashyqtan oqytýǵa aýysty.
Polısııa oblys turǵyndaryna jolǵa shyǵýǵa bolmaıtynyn, kólik júrgizýshilerge qala ishinde araqashyqtyq pen jyldamdyqty saqtaýdy eskertken. At qulaǵy kórinbeıtin aqtútekte dala túgili, qala ishinde júrý qıyndap, jol-kólik oqıǵasy jıiledi. Mysaly, Qostanaıdaǵy Abaı dańǵylynyń boıynda 10 avtokólik bir-birimen qaqtyǵysyp, jaraqat alǵan 1 adam aýrýhanaǵa tústi.
Borandy kúni jol jaǵdaıyn turaqtandyrý úshin shyqqan «QazaqAvtoJol» seriktestiginiń 85 tehnıkasy toqtaýsyz jumys istegenin de aıta ketken jón. Merdiger mekemeler de 526 tehnıka shyǵaryp, oblystyq jáne jergilikti mańyzy bar joldardy arshyp, avtokólik jıi júretin joldarǵa qum-tuz qospasyn shashýmen boldy.
TJD-nyń málimeti boıynsha oblys aýmaǵynda 11 myń 255 adamdyq 257 jylytý pýnkti jumys istep tur.
«Aýa raıynyń qolaısyzdyǵyna baılanysty Amangeldi, Altynsarın, Denısov, Áýlıekól, Jitiqara, Meńdiqara, Sarykól, B.Maılın, Uzynkól, Qamysty, Fedorov aýdandary men Rýdnyı qalasyna qarasty 103 eldi meken elektr qýatynsyz qaldy. Atalǵan eldi mekenderde elektr jelilerin qalpyna keltirý jumystary júrip jatyr. Kásiporyndarmen, túrli mekemelermen turǵylyqty halyqty ýaqytsha baspanaǵa ornalastyryp, kıim-keshek, azyq-túlik jáne sý, ystyq tamaq, kólikpen qamtamasyz etý jóninde kelisimshart jasaldy», dep habarlady oblys ákimdigi.
Aqtútek borannyń astynda júrip jolda qalǵan talaı adamdy arashalap qalǵan oblystyq TJD qyzmetkerleriniń erligin aıtpaı ketpeske bolmas. Máselen, qutqarýshylar Qostomar aýyly mańynda jas bosanǵan áıeldi qar qursaýynan qutqaryp qaldy. Júkti áıeldi aýrýhanaǵa ákele jatqan jedel járdem kóligi jolda qalyń qarǵa batyp qalǵan.
«Aýa raıynyń qolaısyzdyǵyna qaramastan, tótenshe jaǵdaı departamentiniń qutqarýshylar toby júkti áıeldi jedel evakýasııalap, der kezinde perzenthanaǵa jetkizdi», dep málimdedi TJD-nyń qoǵammen baılanys qyzmeti.
Qostanaı oblysy
