Adam quqyn qorǵaý tetikterin kúsheıtý qajet

Máýlen Áshimbaev el Prezı­denti Qasym-Jomart Toqaev adam quqyqtaryn qorǵaý jáne osy saladaǵy zańnamany jetildirý máselelerine árdaıym basa mán berip kele jatqanyn atap ótti. Memleket basshysy byltyr sáýir aıynda «Qazaq­stan Respýb­­lı­kasynyń adam quqyq­tary salasyn­daǵy odan ári sharalary týraly» Jar­lyq­qa ózgerister engizgen bolatyn. Onda áıelderge qatysty kem­sitýshilikti joıý, múgedektigi bar adamdardyń múddesin eskerý, qylmystyq sot tóreligi salasynda jazany oryndaý jáne azaptaý men qatygezdiktiń aldyn alý máseleleri nazarǵa alyndy.

Palata tóraǵasy Parlament tarapynan qoldanystaǵy quqyq qorǵaý tetikterin kúsheıtý baǵy­tyn­da júıeli jumys júrgizilip jat­qanyn da tilge tıek etti. Keıingi jyldary osy salada bir­qatar zań qabyldandy. Onyń ishinde quqyq qorǵaý organdary men sot júıesiniń qyzmetin ret­teıtin jáne qylmystyq pro­sesti izgilendirýdi kózdeıtin quqyqtyq aktiler bar.

«Adam quqyqtaryn qorǵaý máselesi qashanda Parlament Sena­tynyń nazarynda. Konstı­týsııalyq reformanyń nátı­je­sinde azamattardyń quqyq­tary men bostandyqtaryn qor­ǵaý­dyń ulttyq júıesi jańa deńgeıge kóterildi. Memleket bas­shysynyń Jarlyqqa qol qoıýy jáne 9 basym baǵytty quraıtyn Adam quqyqtary men zań ústemdigi salasyndaǵy is-qımyl josparynyń bekitilýi bul saladaǵy kelesi mańyzdy qadam bolǵany anyq. Aldaǵy ýaqytta Parlament Bala quqyqtary jó­nindegi óńirlik ýákil­der­diń mártebesin kúsheı­týge, otba­syn­daǵy turmystyq zorlyq-zom­bylyq salasyndaǵy qyl­mystyq zańna­many qatań­datýǵa, sondaı-aq, eńbek qaýip­sizdigi salasyndaǵy zań­namalyq talaptardy arttyrýǵa baǵyttalǵan zańdar qabyldaıdy», dedi Máýlen Áshimbaev.

Senat tóraǵasy Keńes múshe­le­riniń osy saladaǵy kásibı jáne ómirlik tájirıbeleri mol ekenine nazar aýdaryp, osyndaı otyrysta adam quqyqtary men zań ústemdigin qorǵaý júıesin odan ári damytý perspektıvalaryn talqylaýdyń mańyzdy ekenin aıtty.

Otyrys barysynda Senator­lar keńesiniń músheleri – Palatanyń Konstıtýsııalyq zań­nama, sot júıesi jáne qu­qyq qorǵaý organdary komı­te­tiniń tóraǵasy Nurlan Bek­nazarov, Qazaqstannyń eń­bek sińirgen qaıratkeri, fılologııa ǵylymdarynyń doktory, professor Ádil Ahmet, Ulttyq quryltaı múshesi, «Qa­zaq­stan zańgerler odaǵy» RQB tóraǵasy Serik Aqylbaı, memleket qaıratkeri Sergeı Gromov, «Qazaqstandaǵy parlamen­ta­rızm­di damytý qory» QQ pre­zı­denti Zaýresh Battalova, taǵy basqa qatysýshylar sóz sóıledi.