Solardyń qatarynda Ata zańnyń ústemdigin qamtamasyz etetin, konstıtýsııalyq baqylaýdy júzege asyratyn joǵary organ – Konstıtýsııalyq sotty qaıta qalpyna keltirýdi atap ótken jón. Onyń modelin anyqtaý kezinde eki júz jyldan astam tarıhy bar halyqaralyq tájirıbe eskerildi.
Azamattarǵa bul organǵa tikeleı júginý quqyǵy berilip, olar óz quqyqtary men bostandyqtaryn tikeleı qozǵaıtyn zańdar men ózge de normatıvtik-quqyqtyq aktilerdi daýlaýǵa múmkindik aldy. Azamattardyń óz quqyqtaryn qorǵaýdyń bul quralyn paıdalaný tártibi barynsha jeńildetildi, Qazaqstanda kóp elde qalyptasqan barlyq sot ınstansııasynan ótý talaby joq. Sondaı-aq zańdardyń konstıtýsııalyǵyn tekserýge bastamashylyq jasaý quqyǵy Bas prokýror men Adam quqyqtary jónindegi ýákilge de berildi.
2023 jyldyń basynan qyzmetine kirisken Konstıtýsııalyq sotqa osy ýaqytqa deıin bes myńnan astam adam ótinishin joldap úlgerdi. Olardy qaraý nátıjeleri boıynsha birqatar zańnyń normalary Konstıtýsııaǵa qaıshy dep tanyldy. Keıbir zańdardyń daýly erejelerine konstıtýsııalyq turǵydan túsindirmeler berildi. Konstıtýsııalyq sottyń quqyqtyq ustanymdary men usynystaryn júzege asyrý maqsatynda birneshe zań jobasy ázirlenip, olardyń alǵashqylary qabyldanyp da úlgerdi. Osylaısha, azamattyq qoǵam ókilderiniń tikeleı qatysýymen Konstıtýsııa qaǵıdattarynyń aıasynda ulttyq zańnamany jáne quqyq qoldaný tájirıbesin odan ári jetildirý, olardy halyqaralyq mindettemelerge sáıkestendirý qarqyny artty.
Memleket basshysynyń Konstıtýsııalyq sotty qaıta qurý ıdeıasynyń júzege asýy quqyqtyq júıeni evolıýsııalyq jolmen damytýǵa, azamattardyń konstıtýsııalyq quqyqtaryn qorǵaý kepildikterin jáne eldegi zańdylyq rejimin nyǵaıtýǵa, halyqtyń memlekettik ınstıtýttarǵa degen senimin arttyrýǵa zor yqpalyn tıgizip otyrǵany anyq.
Baqyt NURMUHANOV,
Konstıtýsııalyq sot tóraǵasynyń orynbasary
