Prezıdenttiń aldaǵy atqarylatyn basty mindetterge aıryqsha mán bere sóıleýi 2024 jyldyń el ómirine oń ózgerister alyp keletin jaýapty jyl bolaryna sendiredi. Máselen, 2029 jylǵa qaraı ishki jalpy ónimniń eki eselenýin kózdeıtin jańa ekonomıkalyq úlgige kóshý el ekonomıkasy úshin mańyzdy qadam ekenin taǵy bir márte qadap aıtty. Kóp kúttirmeı Úkimettiń keńeıtilgen otyrysynda osyǵan baılanysty naqty is-sheshimder aıqyndalatynyn jetkizdi. Syrtqy saıasatqa keletin bolsaq, mundaǵy jasalatyn árbir qadam tikeleı ult múddesimen ushtasa júzege asatynyn málimdedi. Qazaqstan bıyl birneshe bedeldi halyqaralyq uıymǵa tóraǵalyq etetinin oqyǵanda, kóńilimiz marqaıyp, elimizdiń shet memleketter arasyndaǵy abyroı-bedelin asqaqtatar mundaı bastamalarǵa zor úmitpen kóz tiktik. Baýyrlas halyqtar arasyndaǵy mádenı-gýmanıtarlyq baılanystardy keńeıtý jáne ulttyq sport túrlerin tanymal etý úshin Qazaqstanda Dúnıejúzilik kóshpeliler oınyn ótkizý ıdeıasy jyl muratymen jyly astasyp jatqany qýantady.
Osy oraıda bizdi, ǵalymdardy taǵy bir erekshe jaıt – tarıhı iri tulǵalar taǵylymymen tabystyratyn is-sharalarǵa memlekettik deńgeıde kóńil bólinip otyrǵany súısintedi. Belgili ǵalym Qanysh Sátbaevtyń – 125, qazaqtyń batyr uldary Saǵadat Nurmaǵambetov pen Rahymjan Qoshqarbaevtyń – 100, sondaı-aq Joshy ulysynyń 800 jyldyǵy atalyp ótpek. Munyń qabatynda Qazaqstan tarıhyna qatysty aýqymdy jobanyń aıaqtalý kezeńi jaqyndap qalǵanyn bilip jatyrmyz.
2022 jylǵy Qańtar oqıǵasy týraly buǵan deıin dál osynshalyq aýqymdy jáne ashyq áńgime bolmaǵan edi. Suhbattan qaıǵyly oqıǵanyń basqa da sebepteri men alǵysharttary týraly egjeı-tegjeı maǵlumat alyp, kókeıde júrgen kóp suraqqa jaýap taptyq. Jyldar boıy jınaqtalyp, sheshimin tappaǵan áleýmettik-ekonomıkalyq problemalar qoǵamda narazylyq týdyrǵany, al mundaı sátti ózgeristi qalamaıtyn, qoǵamdaǵy taýarlardy ádil bólýge baǵyttalǵan reformalardy qabyldaǵysy kelmeıtin top ózderiniń múddesine paıdalanýǵa áreket etkeni, qylmystyq toptar men arandatýshylar zorlyq-zombylyqpen, talqandaýmen, órteýmen, múlikti joıýmen aınalysyp, narazylyq sońy jaǵdaıdyń ýshyǵýyna ákelip tiregeni málim. Prezıdenttiń sondaǵy batyl is-áreketi táýelsizdik týyn shaıqaltpaı ustap qaldy.
Prezıdent elimizdiń ekonomıkalyq damýyna aıryqsha toqtaldy. Ulttyq ekonomıkanyń kólemin eki esege deıin arttyrý el aldynda turǵan aıqyn maqsattyń biri sanalady. Buǵan qalaı qol jetkizýge bolady? Resýrstardy ońtaıly bólý jáne tıimdi josparlaý arqyly ǵana ekonomıkanyń tamyryna qan júgiretini anyq. Osy oraıda álemdegi ekonomıkalyq ahýaldyń kúrdeli jaǵdaıy el damýyna salqynyn tıgizbeı turmasyn tilge tıek etken Memleket basshysy kez kelgen qıyndyqtyń ózi keıde jańa múmkindikke jol ashatynyn, ol úshin Úkimettiń sondaı kúrdeli kezeńnen alyp shyǵatyn jan-jaqty oılastyrǵan jospary bolýy kerektigin aıtty. Prezıdenttiń osy sózine biz de tolyǵymen qosylamyz. Úkimettiń kúndelikti jumysyndaǵy basty qaǵıda osy sóz bolǵany jón. Olaı deıtin sebebimiz, qazirgi azyq-túlik problemasy bolsyn, qymbatshylyq pen baǵanyń turaqsyzdyǵy bolsyn, eldegi basqa da sheshimin tappaǵan áleýmettik máselelerdiń qaı-qaısysy da Úkimet qabyldaǵan sheshimderge baryp tirelip jatatyny aıdan anyq.
Prezıdenttiń bilimpazdyq, kásibılik, adaldyq sııaqty adamı qasıetter týraly málimdemesi erekshe nazar aýdarýǵa turarlyq. Sonymen birge ol jat mádenıetke elikteýdi, jalǵan patrıotızmdi jáne daraqy maqtanýdy áste qabyldamaıdy. Memleket basshysynyń bul turǵyda aıtqandary ozyq oıly zııaly qaýym ókilderiniń de oılarymen árdaıym qabysyp turatyny esh kúmán týǵyzbaıdy. Adamı qasıetter men ulttyq qundylyqtar jaıynda qozǵaǵan oılary men árbir sózin janymyzǵa jaqyn tutamyz ári qoǵamnyń oń ózgerisine biz de kúsh-qaıratymyzdy aıamaı jumsaı beremiz.
Osy suhbatty oqyp otyrǵanda taǵy bir ishimizdi jylytqan nárse – «2024 jyldy qalaı qarsy aldyńyz?» degen suraqqa «Jańa jyl maǵan qasterli mereke emes... Onyń ústine, ózimizdiń tól jańa jylymyz – áz Naýryzdy esten shyǵarmaǵan jón. Bul meıram – tirshilikti túlete keletin naǵyz tabıǵı jyl basy» degeni.
Zeınep BAZARBAEVA,
UǴA akademıgi
