Ǵalymjan Jýsanbaev munaı óńdeý jáne munaı-hımııa salasynda basshylyq qyzmetter atqarǵan. Ár jyldary Máskeýdegi N.Semenov atyndaǵy Hımııalyq fızıka ınstıtýtynda, elimizdiń Qarjy mınıstrliginde, Qazaqstan Respýblıkasynyń Irandaǵy elshiliginde keńesshi-elshi (ekonomıka baǵyty, munaı óńdeý jáne munaı-hımııa salalary boıynsha) bolyp jumys istedi.
Shymkent, Atyraý jáne Aqtaý qalalarynda munaı men munaı ónimderin saqtaý jáne óńdeýmen aınalysatyn birqatar kompanııany basqardy. Qazaqstandaǵy munaı-hımııa óndirisin damytýǵa qosqan úlesi úshin Energetıka mınıstrliginiń Qurmet gramotasymen marapattalǵan.
«Sońǵy kezderi Atyraý munaı óńdeý zaýytynda «QazMunaıGaz» UK AQ-men tyǵyz yntymaqtastyǵynyń nátıjesinde oń ózgeristerge qol jetkizildi. Atap aıtqanda, munaı óńdeý jáne motor otynyn shyǵarý kólemi artty. K-5 klasyndaǵy AI-92 benzınin (EVRO-5 standartynyń analogy) óndirý jolǵa qoıyldy. Avıakerosın óndirý kólemi ulǵaıyp, katalıtıkalyq krekıng qondyrǵysy 300 t/saǵ jobalyq qýatyna shyǵaryldy. Elektr energııasyn tehnıkalyq esepke alýdyń avtomattandyrylǵan júıesi engizildi. Shyǵyndardy azaıtý jáne kásiporynnyń ekologııalyǵyn arttyrý maqsatynda rezervýarlarǵa 6 ponton ornatyldy», dep habarlady zaýyttyń baspasóz qyzmeti.
Kásiporynnyń operasııalyq tıimdiligin arttyrý úshin qajetti sharalar iske asyrylyp jatyr. Zaýytty elektrmen jabdyqtaýdyń senimdiligin qamtamasyz etý úshin gaztýrbınalyq elektr stansııasyn salý jobasy qolǵa alyndy. Tazalyq ekologııalyq jobasynyń eki kezeńi jáne býlaný alańdarynyń eki sektoryn rekýltıvasııalaý jumystary aıaqtaldy.
