Foto: alatau24.kz
Senator maqalasynda bıylǵy mereıtoı qarsańynda Joshy Ulysynyń tarıhy jańasha zerdelenetinine senim bildirgen.
«Ulyq ulys – bul jaı ǵana memlekettik qurylym emes, biz Eýrazııa dep ataıtyn ulanǵaıyr keńistiktegi halyqtardyń tarıhyna arqaý bolǵan órkenıettik matrısa. Ony órkenıet-memleket dep te ataıtyndar bar. Quramyndaǵy jurttardyń tili men dinine, dástúrine qysym jasamaǵan Ulyq ulys olardyń mádenıetiniń ósip-órkendeýine úlken úles qosty. Sondyqtan ol «mádenıetter mozaıkasyn» túzgen tıimdi memleket tetigi arqyly qalyptasqan tutas júıe. Elimizdegi toleranttylyq tamyry osy dástúrmen úndes jatyr. Qazir qaıta jańǵyrǵan Jibek jolyna ıelik etken, shyǵys pen batysty jalǵaǵan Ulyq ulystyń ekonomıkalyq aspektilerin zerdeleý de mańyzdy. Bul rette, memlekettilik tarıhyn Altyn Ordadan taratatyn elderdiń ǵalymdarymen ortaq murany birlese zerttegen jón. Ásirese «Joshy ulysyn zertteý» ınstıtýtyna úlken jaýapkershilik júkteleri anyq», dep jazdy Darhan Qydyráli.
Ol sondaı-aq, mektep pánderindegi ótken tarıhymyzǵa qatysty tolaıym aqparattardyń tym qysqa berilgenin aıtyp, «ult tarıhyn bilmeý – qasiret! Alaıda odan ótken qasiret bar, ol – tarıhty jańylys bilý. Ulttyq sanaǵa tarıhı sana negiz bolady desek, burmalanǵan túsinikten qate tanym qalyptasatynyn alǵa tartty».
«Bıyl aıaqtalatyn Qazaqstan tarıhynyń kóp tomdyǵy Joshy ulysyna qatysty tyń derekterdi usynady dep úmittenemiz. Mektep oqýlyqtary osy kóptomdyq negizinde qaıta jazylǵany abzal. Onda Joshynyń qazaq handarynyń atasy ekeni basa aıtylýy tıis. Sonymen qatar oqýlyqtarǵa qazaq memlekettiliginiń bastaýlary týraly da sony derekter engizý kerek. Máselen tarıhı Talas quryltaıy ótken, Jetisý men Syr arasynda qurylǵan Moǵolstan memleketine 6-7 synypqa arnalǵan oqýlyqta 1 paragraf, al 10-synypqa arnalǵan oqýlyqta 4-5 jol ǵana arnalǵan. Al osy Moǵolstan jerinde, Shý boıynda Qazaq handyǵynyń negizi qalanǵany belgili. Bir aıta keterligi, JOO-daǵy mamandyqtarǵa qazaq tarıhy pániniń engizilgeni quptarlyq. Osy pándi metodologııalyq birizdilikke keltirip, memlekettiligimizdiń bastaýlaryna basymdyq berilgeni jón», dep jazdy ol.
Darhan Qydyráli tarıhı tulǵalardyń mereıtoılary toı-toılaý úshin emes, oı oılap, tarıhı sanaǵa oń yqpal etý úshin qajet ekenin de tilge tıek etti.
