Kezekshiler bólimine kópqabatty úıdiń bir páterinde órt bolyp jatqandyǵy týraly sýyt habar túsisimen oqıǵa ornyna birden jetken. Aldymen, sál-pál barlaý jasady. Shamasy as úı bolsa kerek, terezesi ashyq. Páterdiń ózge terezelerinen qoıý qara tútin býdaqtap tur. As úıdiń terezesinen kishkentaı qyzdyń úreıli júzi kórinedi. Áriptesteri Rústem Manatov pen Asqar Áljanov birden órt sóndirýge kirisken. Anas Záınish baspaldaq qura bastady. Shalt qımyldap, daıyndyq jumystaryn qas qaǵymda aıaqtap, Qanat baspaldaqpen joǵary kóterildi. Aldymen kórgeni kishkentaı qyzdyń jasqa shylanǵan janary. Bul basý aıtqan.
– Qoryqpa botam, qazir aman-esen jerge túsiremin, – degen Stepnogor qalalyq tótenshe jaǵdaılar basqarmasynyń bólimshe komandıri, aǵa serjant Qanat Asqarov kishkentaı qyz qorqynyshqa boı aldyrmasyn dep.
– Qutqaryńyzshy, aǵaı, – dedi tula boıy úreıden qalshyldap turǵan kishkentaı qyz.
Onyń ar jaǵynda taǵy bir bala bar eken. Bajaılap qarasa, eki jas shamasyndaǵy kishkentaı baldyrǵan. Abyroı bolǵanda kishkentaı qyz tútin kirmesin degen bolýy kerek as úıdiń esigin jaýyp qoıypty. Áıtkenmen, sańylaýdan ashy tútin syzdyqtap enip jatyr. Oılanyp-tolǵanýǵa ýaqyt qaıda, Qanat jetiler shamasyndaǵy qyzdy oń qolymen qapsyra qushaqtap aldy da, baspaldaqpen tómen túse bastady. Qas qaǵym sát qymbat bolyp ketetin mundaı ýaqytta jattyǵý kezinde jaı oǵyndaı atylatyn jyldamdyq kemip, ýaqyt shirkin tez ótetin tárizdi. Kishkentaı qyzdy qaýmalǵan adamdarǵa tapsyrǵan soń ekinshi sábıdi qutqarýǵa umtylǵan. Eki jasar balany kóterip tómen túsken soń ǵana es jıdy. Álginde kórgeni tús sııaqty bulyńǵyr. Qutqarýshynyń ábjil qımylyna tánti bolǵan bógde bireýler alǵysyn aıtyp jatyr.
– Mine, azamat! – degen bireýi. – Eki birdeı balany ajal tyrnaǵynan aman alyp qaldyń.
Bólimshe basshysy Qanattyń tótenshe oqıǵaǵa tap bolǵan sáti jalǵyz bul emes. Birde jylý elektr ortalyǵynyń qazandyǵynda órt shyqqan. Oqys oqıǵaǵa sebepshi elektr symdary eken. Aýqymy úlken, onyń ústine az ǵana ýaqyttyń ishinde bel alyp ketken. Tynystaý qıyn bolǵan soń ottegi toltyrylǵan ballondardy paıdalanýǵa týra keldi. Álsin-álsin aýystyryp otyrdy. Bólimshedegi jaýyngerlerdiń bir-birimen qoıan-qoltyq jumys isteýleriniń arqasynda órt oqshaýlanǵan.
Keıipkerimizben tildesip otyryp mundaı oqys oqıǵalardyń jıi kezdesetindigin uqtyq. Ásirese jylý berý maýsymy bastalǵan kezde kóbeıetin kórinedi. Bulardyń bólimsheleri Stepnogor qalasynyń mańyndaǵy birneshe eldi mekenderge qyzmet kórsetedi. Al aýyl turǵyndarynyń basym kópshiligi kómir jaǵady. Qaısybiriniń elektr qýatyn taratatyn symdary eskirgen. Keıbir peshterde de aqaý bar. Áıteýir, qaýip qaıdan deriń bar ma?!
Keıbir oqıǵalar kezinde qutqarýshylardyń ómirine de qaýip tónip jatatyny bar. Birde qala irgesindegi saıajaıda shaǵyn úı órtendi. Ile jetken bular mán-jaıdy barlaǵan. Saıajaı ishindegi gal ballony der kezinde shyǵaryldy. Jazataıym ystyqtan jarylyp ketse qutqarýshylardyń da ómirine qaýip tóner edi.
Joǵaryda atalǵan oqıǵa, ıakı eki balany órtten qutqarý kezindegi qajyrly is-qımyly úshin bólimshe komandıri Qanat Asqarov arnaıy tósbelgimen marapattaldy. О́z jumysyna adal, jaýapkershiligi joǵary jaýyngerdiń erligin aıǵaqtaıtyndaı belgi. Biraq Qanat úshin el alǵysyna bólengennen qymbat eshteńe joq.
Aqmola oblysy,
Stepnogor qalasy
