Sýretti túsirgen – Erlan OMAR, «EQ»
Elimizde Memleket basshysynyń bastamasymen 2019 jyldan bastap Prezıdenttik jastar kadr rezervine irikteý jumystary júrgizilip keledi. Máselen, 2023 jyldyń basynda Prezıdenttik jastar kadr rezervindegi 350 adamnyń ishinen túrli jaýapty laýazymǵa 258 adam taǵaıyndaldy, onyń ishinde 34-i saıası memlekettik qyzmetshi jáne «A» korpýsynyń saıası memlekettik qyzmetshisi (apparat basshylary, komıtet tóraǵalary). 2023 jyldyń sońynda Ulttyq komıssııanyń sheshimimen Prezıdenttik jastar kadr rezervine 50 adam qabyldandy. Sondaı-aq Májilis pen máslıhat depýtattary úshin jastar, áıelder jáne múmkindigi shekteýliler qatarynan 30 paıyz kvota engizildi. О́zgerister negizinde Májiliske 35 jasqa deıingi 8 depýtat saılanǵan.
Shynymen, jastar kez kelgen qoǵamnyń damýyna serpin beredi. Olardyń belsendiligi memlekettiń damý qarqyny men baǵytyn anyqtaıdy. Jastar basqa jas top ókilderimen salystyrǵanda mobıldiligi, bastamashyldyǵy, ınnovasııalyq transformasııalarǵa, jańa tehnologııalarǵa beıimdiligi, túrli syn-tegeýringe qarsy turý qabiletimen erekshelenedi.
Osyǵan oraı bul top ókilderiniń bılik qurylymdaryna belsendi tartylýy zańdylyq. Prezıdent suhbatta jas mamandardy memlekettik qyzmetke belsendi tartý saıasaty jalǵasatynyn atap ótti. Bul – óz kezeginde bilimdi, jasampaz, jańa ıdeıalarǵa sebepshi jastarǵa beriletin úlken senim men múmkindik.
Dýlat О́TEǴALI,
QSZI Elektoraldy úderisterdi zertteý bóliminiń bas sarapshysy
