Eńbek jáne halyqty áleýmettik qorǵaý mınıstrliginiń uıymdastyrýymen qurylǵan arnaıy komıssııa 4-24 qańtar aralyǵynda tergeý júrgizdi. Atalǵan kezeń ishinde Tótenshe jaǵdaılar mınıstrligi О́nerkásiptik qaýipsizdik komıteti tóraǵasynyń orynbasary Musa Tanabaevtyń tóraǵalyǵymen komıssııa músheleri jobalyq qujattamany zerdelep, tergeýge 4 saraptamalyq uıymdy, onyń ishinde Reseı Federasııasynyń sarapshysyn tartqan. Mamandar altyn óndirýshi kásiporynnyń kýágerleri men laýazymdy tulǵalary arasynda saýalnama júrgizdi. Sonymen qatar komıssııa músheleri shahtaǵa túsip, oqıǵa ornyn zerttedi.
«Bizdiń komıssııa jan-jaqty tergeý júrgize otyryp, barlyq jaıtty nazarǵa aldy. Komıssııa taý-ken massasynyń qulaýy saldarynan oryn alǵan toptyq jazataıym oqıǵanyń sebepteri retinde kelesilerdi ataıdy:
– Jumys óndirisi qanaǵattanarlyqsyz deńgeıde uıymdastyrylǵan;
«Maıqaıyńaltyn» AQ jaýapty tulǵalary tarapynan taý-ken jumystarynyń qaýipsiz júrgizilýine óndiristik baqylaý tıisti túrde júzege asyrylmaǵan;
– Bloktardy óńdeý kezinde qazbalardyń qulaý úderisin baqylaý tıisinshe júzege asyrylmaǵan degen qorytyndyǵa keldi.
Sonymen qatar shahta ústindegi bos keńistikterge tıisti baqylaý júrgizilmegeni, jobalyq qujattamaǵa sáıkes ázirlengen tazartý keńistigindegi bos jerlerdiń qulaý yqtımaldylyǵy bar ekeni nazarǵa alynbaǵany anyqtaldy. Osynyń saldarynan kenetten taý massasy qulap, jazataıym oqıǵa oryn alǵan», dep habarlady Tótenshe jaǵdaılar mınıstrligi О́nerkásiptik qaýipsizdik komıteti Pavlodar oblysy boıynsha departamentiniń basshysy Danııar Andasov.
Tergeý nátıjeleri boıynsha komıssııa músheleri jazataıym oqıǵanyń sebepterin joıý jónindegi is-sharalardy jáne olardyń oryndalý merzimderin aıqyndady. Onyń ishinde shahta dırektorynyń, bas ınjenerdiń, bas marksheıderdiń, ýchaskelik marksheıderlerdiń laýazymdyq nusqaýlyqtary ónerkásiptik qaýipsizdik salasyndaǵy zańnamanyń talaptaryn eskere otyryp, qaıta qaralmaq.
D.Andasovtyń aıtýynsha, budan basqa taý-ken qazbalarynyń ónerkásiptik qaýipsizdik talaptaryna sáıkestigine egjeı-tegjeı tekserý júrgiziledi. Qulaýy múmkin aımaqtardy jáne qaýipsizdik normalaryn qamtamasyz etýdi eskere otyryp, avtokólik qozǵalysynyń marshrýttary da ázirlenedi.
Komıssııa sheshimi boıynsha, toptyq jazataıym oqıǵanyń oryn alýyna kináli retinde 7 adam jaýapty dep tanylyp otyr. Eńbek zańnamasyna sáıkes tergeý materıaldary quqyq qorǵaý organdaryna jiberildi.
Apat bolǵan jerde avarııalyq-qutqarý jumystary oqıǵa oryn alǵan sátten bastap udaıy júrgizilip jatyr. Buǵan deıin oıyq túbine shaǵyn ekskavator túsirilip, geologııalyq skaner arqyly belgilengen jerlerdi qazý jumystary jalǵasyp jatyr.
«Qazirgi ýaqytta qutqarýshylar ekskavatordyń jolyna bógeý bolyp turǵan salmaǵy 5 tonnadan asatyn asa iri emes tastardy pnevmo-elektr quraldarynyń kómegimen alyp tastap jatyr. Qutqarýshylar aýyr jaǵdaıda jumys isteýde. Oıyq shetindegi topyraqtyń tómen syrǵýy áli de jalǵasyp jatyr. Barlyq jumysqa 147 adam, 45 tehnıka jumyldyrylǵan», deıdi Pavlodar oblysy tótenshe jaǵdaılar departamenti bastyǵynyń orynbasary Oleg Treshev.
Qutqarýshylardyń sózine súıensek, shuńqyrdyń astynda bos keńistikter bar. Jumys istep jatqandar kez kelgen sátte álgi oıyqtarǵa túsip ketýi ábden múmkin. Sondyqtan qutqarýshylar asa saqtyqpen qımyldap jatyr.
Aıtpaqshy, jer astyna túsip ketken qutqarýshylardy izdeýge Aıgúl esimdi kóripkeldiń Maıqaıyńǵa kelgeni týraly aqpar taraǵan edi. Tótenshe jaǵdaı departamenti balgerdi tabylmaı jatqan azamattardyń týystary shaqyrtqanyn habarlady.
«Tótenshe jaǵdaılar departamentiniń bul kóripkeldiń kelýine eshqandaı qatysy joq, qaıǵyly oqıǵa ornyna izdelip jatqan qutqarýshylardyń týystary shaqyrtqan. Olardyń bul áreketine eshqandaı vedomstvo kedergi keltire almaıdy. Kóripkel áıel týystarymen birge oıyqtan qaýipsiz araqashyqtyqta turdy. Qutqarýshylar júrgizip jatqan izdestirý-qutqarý jumystaryna jaqyndaǵan joq. Tótenshe jaǵdaı mamandary men ózge de mamandar nusqaýlyqqa sáıkes jumys istep jatyr. Jumysta topyraqtyń qozǵalýyn skanerleıtin tehnıka, geologııalyq skaner jáne metall izdegish qoldanylǵan. Sondaı-aq oıyqtyń túbinde kınologııalyq top izdestirý sharalaryn júrgizip jatyr. Jumys baǵytymyz arnaıy aspaptardyń kórsetkishteri negizinde túzetilip otyrady», dep habarlady óńirlik tótenshe jaǵdaılar departamentiniń baspasóz qyzmetinen.
Pavlodar oblysy,
Baıanaýyl aýdany,
Maıqaıyń kenti
