Foto: turkystan.kz
«Qazgıdromet» mekemesiniń habarlaýynsha, qazirgi sátte Shyǵys Qazaqstandaǵy sý qoımasynda jınalǵan sýdyń kólemi 30 mlrd tekshe metrge jetken. Bul – ótken jylǵymen salystyrǵanda 5 mlrd tekshe metrge kóp. Kóktemgi sý jiberý kezeńinde Shúlbi sý qoımasynan keletin búıirlik aǵyn oıdaǵydaı bolsa, Ertis ózenine tıesili jaıylmalardyń 70 paıyzyn sý basýy kerek.
«Byltyr Salaaralyq sý bosatý komıssııasynyń sheshimimen bosatylǵan sý jetpeı qalyp, jaıylmalardyń nebári 30 paıyzy tirshilik nárine qanyqqan. Mundaı keleńsiz jaǵdaı keıingi 10 jylda birinshi ret kezdesti. Al bıyl Shyǵys Qazaqstannyń taýly aımaqtarynda ornalasqan sý qoımalarynda ylǵal mol ekeni baıqalady. Úlbi jáne Ýba ózenderinen keletin sý da mol bolyp, kóktemgi tabıǵat qorǵaý sharalary oıdaǵydaı ótedi dep oılaımyz. Bizdiń esebimizshe, Ertis ózeni aýmaǵynda ornalasqan jaıylmalardyń kemi 70 paıyzyna sý jetedi. Buǵan qosa ótken jyly Pavlodar oblysynyń ákimdigi ózenniń arnasy men tarmaqtaryn tazartty. Ol da oń nátıje berýi kerek. Al sýdyń qashan jáne qandaı kólemde bosatylatynyn komıssııa sheshedi», deıdi «Ertis» basseındik ınspeksııasynyń basshysy Medet Jádigeruly.
Aıtyp óteıik, byltyr Pavlodar oblysynda tabıǵı gıdrologııalyq rejimniń buzylýyna Shyǵys Qazaqstandaǵy sý qoımalarynan sýdyń normaǵa saı bosatylmaýy sebep bolǵan edi. Saldarynan ózenniń jaıylmalary qanyqpaı, shabyndyqtar qurǵap ketti. Ertis ózeniniń arnasy tartylǵany óz aldyna, qumdaýyt jerlerdiń paıda bolýy ekologterdi qatty alańdatyp otyr.
О́ńir basshylyǵy sý tapshylyǵynan jıi zardap shegetin aýmaqtarda lımandyq sýarýdy damytýǵa múddeli. Pavlodar oblysynyń ákimi Asaıyn Baıhanovtyń aqparynsha, aımaq aldaǵy alty jyl ishinde barlyq lımandyq sýarý júıelerin rekonstrýksııalaýdy kózdep otyr. Mysal úshin, bıyl Baıanaýyl aýdanynda kólemi – 6,7 myń, Maı aýdanynda – 14,6 myń gektar bolatyn Qolybaev lımandyq júıesin qaıta jańartý jobasy qolǵa alynady.
– Oblysta sýarmaly jerler jelisin keńeıtý máselesi – óte mańyzdy ári ózekti. Bıyl bul kórsetkishti 175 myń gektarǵa deıin jetkizýdi josparlap otyrmyz. Bul úshin taǵy 6 jobany jalǵastyramyz. Bizdiń fermerler shetelde shyǵarylǵan 81 birlik sýarý mashınalaryn satyp aldy (Valley, Zimmatic, RKD, Bauer). Sondaı-aq lımandyq sýarýdy damytý boıynsha jumystardy bastap kettik. Bulardyń jalpy aýmaǵy – 73,3 myń gektar, – deıdi A.Baıhanov.
Lımandyq alqaptar boıynsha memlekettik saraptama qorytyndysy osy jyldyń aqpan aıynda shyǵýǵa tıis. Odan soń Sý resýrstary mınıstrligimen birlesip, qarjylandyrý máselesi pysyqtalady. Jalpy, Ertis-Baıan óńiriniń fermerleri sýarmaly jerlerdi kóbeıtýge basa mán berip otyr. Keıingi 4 jylda olardyń jalpy alańy 65 myń gektarǵa ósken. Tek byltyr 6 joba júzege asyp, jańadan 3,3 myń gektar iske qosylǵan. Sharýalar ınvestısııalyq sýbsıdııalaý baǵdarlamasy boıynsha bólingen 2,4 mlrd teńgeni tolyǵymen ıgerdi.
Pavlodar oblysy
