Oblys halqynyń 32 myńǵa jýyǵyn múgedektigi bar adam quraıdy. Onyń ishinde 18 jasqa deıingi múgedektigi bar balalar sany — 7 313. Mańǵystaý oblystyq jumyspen qamtýdy úılestirý jáne áleýmettik baǵdarlamalar basqarmasynyń arnaýly áleýmettik qyzmetterdi úılestirý bóliminiń basshysy Mýmınat Mýsınanyń aıtýynsha bul kórsetkish jyldan jylǵa ósip keledi.
− Statıstıka derekterine sáıkes, erekshe muqtajdyǵy bar balalar sany jyl sanap artyp keledi. Oblys boıynsha múgedektigi bar balalardy áleýmettik qorǵaý máselesin jolǵa qoıý jan-jaqty oılastyrylǵan. Alaıda qazirgi tańda oblys kóleminde aýtızmi bar balalarǵa arnalǵan memlekettik arnaýly áleýmettik qyzmetter kórsetetin ortalyqtar nemese ońaltý ortalyqtary joq. Mundaı ortalyqtar respýblıka deńgeıinde de joqtyń qasy. Osyǵan baılanysty barlyq oblys ortalyqtarynda aýtızmi bar balalarǵa arnalǵan jartylaı stasıonarlyq jaǵdaıda ońaltý ortalyǵyn ashý týraly tapsyrmalar tústi, − dedi Mýmınat Mýsına.
Bul maqsatta oblystyq jumyspen qamtýdy úılestirý jáne áleýmettik baǵdarlamalar basqarmasy 9-shaǵynaýdanda ornalasqan № 42 ǵımaratty óz teńgerimine alyp, ǵımaratqa jobalaý – izdestirý jumystaryn júrgizgen. Ortalyqtyń jobalyq-smetalyq qujattamasyn jasaqtaý maqsatynda oblystyq bıýdjetten qarjy bólindi.
