Foto: Týrızm jáne sport mınıstrliginiń baspasóz qyzmeti
2023 jyly Ázerbaıjannyń bas shahary – Bakýde ótken nysana kózdeýden 53-shi lısenzııalyq álem chempıonatynda otandasymyz erler arasynda 10 metrge pnevmatıkalyq myltyqtan atý jattyǵýynda 206,5 upaımen 4-oryn alyp, Olımpıada lısenzııasyna ıe bolǵan edi.
Islam Sátbaev 1998 jyldyń 21 qyrkúıeginde Almaty qalasynda dúnıege kelgen. Nysana kózdeý sportymen 7-synyptan beri aınalysyp keledi. Mektep qabyrǵasynda júrgende synyptasy oǵan tır atyp kórýdi usynǵan. Sodan bastap onyń oq atýǵa degen qyzyǵýshylyǵy oıanyp, birden nysana kózdeý úıirmesine jazylady. Alǵashqy jattyqtyrýshysy Valentına Derıglazovanyń tálim-tárbıesimen atalǵan sporttyń qyr-syryna qanyǵa bastaıdy. Eńbek sińirgen jattyqtyrýshy 5 jyl boıy ony balalar sport mektebinde jattyqtyrǵan.
Keıin Islam Sátbaev Mamandandyrylǵan joǵary sport sheberligi mektebine aýysyp, kúni búginge deıin eńbek sińirgen jattyqtyrýshy Gennadıı Nasonovtan jattyǵyp keledi.
Jerlesimiz 2023 jylǵy Álem kýboginde eki márte kúmis júlde jeńip alsa, Qytaıdyń Hanchjoý qalasynda ótken Azııa oıyndarynda qola medaldi moınynda jarqyratty.
Parıj Olımpıadasyna joldama jeńip alǵanan keıin ol alǵashqy áserin týǵan-týystarymen bólisken. Olar teledıdar arqyly tamashalap, lısenzııa oljalaǵanyn sportshynyń ózinen buryn bilgen. Qazirgi ýaqytta Islam Sátbaev jeke jattyqtyrýshysymen birge tórtjyldyqtyń basty dodasyna qarqyndy daıyndalyp jatyr.
«Menińshe, Per Kýbertenniń «Eń bastysy – jeńis emes, oıyndarǵa qatysý» degen urany eskirdi. Olımpıadaǵa qatysatyn kez kelgen sportshy medal oljalaǵasy keledi. Men de dál solaı oılaımyn. Biraq Olımpıadada sátti óner kórsetý úshin sportshy naǵyz sporttyq babynda bolýy kerek. Ol úshin daıyndyqty bir sátke de toqtatpaı, únemi sheberligińdi shyńdap otyrýǵa tıis», deıdi Islam Sátbaev.
