Foto: N.Baıbýlın.
Máýlen Áshimbaev qazirgideı tehnologııa zamanynda kreatıvti ındýstrııanyń ekonomıkalyq múmkindigi men keleshegi zor ekenin, Memleket basshysy Qasym-Jomart Toqaevtyń tapsyrmasymen Qazaqstanda osy salany damytý baǵytynda aýqymdy sharalar iske asyrylyp jatqanyn atap ótti.
«Prezıdentimiz Joldaýynda kreatıvti ındýstrııany jáne zamanaýı tehnologııany damytý jóninde naqty mindetter júktedi. Sondaı-aq Memleket basshysy iri qalalarmen birge aýdandarda da shyǵarmashyl jastardy qoldaýǵa arnalǵan ortalyqtar ashý qajet ekenin aıtty. Sonyń sheńberinde osyndaı habtardyń mańyzy zor. Bul jerde biz kreatıvti alańdardyń jaı-kúıimen, jumysymen jáne aldaǵy josparlarymen tanysa alamyz. О́zderińizge belgili, taıaýda kreatıvti sektor úshin salyqtyq jeńildikter qarastyryldy. Osyndaı naqty sharalar elimizde bul salany damytýǵa tyń serpin beredi dep senemiz», dedi Máýlen Áshimbaev.
Sonymen qatar Senat Tóraǵasy kreatıvti ındýstrııanyń jaǵdaıy adamı kapıtaldyń sapasyn kórsetetin negizgi faktorlardyń biri ekenin aıtty. Qazirgi ýaqytta kreatıvti sektordyń el ekonomıkasyndaǵy úlesi 1 paıyzdan aspaıdy. Osy kórsetkishti jaqsartý úshin aldaǵy ýaqytta atalǵan ındýstrııany damytý jolynda jan-jaqty, onyń ishinde, zańnamalyq baǵytta da birlesken ári júıeli jumys qajet.
«Bul baǵytty tıimdi damytý úshin salalyq zańnamany jetildirý de asa mańyzdy. Osyǵan oraı depýtattar tıisti jumystardy atqaryp jatyr. Sondaı-aq qazir kreatıvti ındýstrııa bilim berý úderisiniń de ajyramas bólshegine aınalǵanyn kórip otyrmyz», dedi Senat Tóraǵasy.
Is-sharaǵa Mádenıet jáne aqparat mınıstrliginiń ókilderi, kınorejısserlar, prodıýserler, teatr akterleri, sýretshiler jáne basqa da óner qaıratkerleri qatysty.
