Oblystyq polısııa departamentiniń qyzmetkerleri Jambyl, Túrkistan oblystarynyń jáne Almaty men Shymkent qalalarynyń turǵyndarynan turatyn qylmystyq toptyń zańsyz áreketin áshkerelep, olardyń «jumysyna» tosqaýyl qoıdy. Departamenttiń baspasóz qyzmeti taratqan habarlamada qylmystyq toptyń quramynda birneshe adamnyń bolǵany, olardyń bul isti birlese atqarǵany aıtylǵan.
Polısııa departamentiniń habarlaýynsha, qylmystyq top músheleri kólik tizgindegisi kelgenderdiń oqýǵa tıis sabaqtaryn jáne kólik basqarý múmkindigin tájirıbe júzinde qadaǵalap teksermegen. Qarjylaı syıaqy úshin júrgizýshi kýáligin shúlen taratqandaı zańsyz úlestirýmen uzaq ýaqyt boıy aınalysyp kelgen. «Myń asqanǵa – bir tosqan». Kýálik «saýdasynyń» kórkin qyzdyrǵandardyń keıbiri jumys ornynda jaıbaraqat otyrǵan jerinen ustaldy.
Derekke sensek, qylmystyq toptyń quramynda HQKO qyzmetkerlerinen bólek, joǵaryda aıtylǵan óńirlerden júrgizýshi kýáligin alýǵa nıet bildirgen tutynýshylardy izdestirgen arnaıy «kómekshiler» de bar. Eń soraqysy, qujattar Taraz qalasynda ornalasqan halyqqa qyzmet kórsetý ortalyǵynda rásimdelip, ıelerine taratylyp otyrǵan.
Quzyrly organ qyzmetkerleriniń jedel iske kirisýiniń arqasynda kúdiktiler der kezinde ustaldy. Qazirgi kezde zań talabyna sáıkes tergeý jumystary júrgizilip jatyr. Qolǵa túsken kúdiktilerdiń qatarynda halyqqa qyzmet kórsetý ortalyǵynyń basshylary sekildi laýazymdy tulǵalar da bar.
«Tirkelgen qylmystyq is boıynsha tergeý áreketteri júrgizilip jatqanyn aıta ketken jón. Qazirgi ýaqytta júrgizýshi kýáligin zańsyz berýdiń 35 deregi anyqtaldy. Qylmystyq júıeni uıymdastyrýshylar men oryndaýshylar ýaqytsha ustaý ızolıatoryna qamaýǵa alyndy», deıdi oblystyq polısııa departamenti basshysynyń orynbasary Almaz Almatov.
Jambyl oblysy
