Spektakldiń daıyndyq jumystary
Sóz zergeri Ǵabıt Músirepovtiń «Qozy Kórpesh – Baıan sulýy» - qazaq dramatýrgııasyndaǵy erekshe qubylys ekeni sózsiz.
О́ziniń 50 jyldyq tarıhynda Qazaqstan ǵana emes, alys-jaqyn shetelderge tanymal bolǵan «Bayan Sulu» brendi halqymyzdyń baı mádenı murasyn óndiristik baǵdaryna arqaý etip keledi. «Baıan Sulý» AQ Basqarma tóraǵasy-prezıdenti Tımýr Sadyqovtyń aıtýynsha, «Qozy Kórpesh – Baıan Sulý» spektakline demeýshilik jasaý – ulttyq jáne mádenı qundylyqtarymyzdy qoldaýǵa, nasıhattaýǵa barynsha yqpal etedi.
«Spektakldyń jaryqqa shyǵýyna demeýshilik jasaý arqyly qoǵamdy el tarıhynyń mańyzdy kezeńderine nazar aýdarýǵa úndeımiz. Bul ańyz -mahabbatty jáne danalyqty, erlik pen shydamdylyqty dáripteıtin ulttyq qundylyqtyń jarqyn úlgisi. Qoıylym kórermenin qýantyp qana qoımaı, XIII-XIV ǵasyrlardaǵy qazaqtyń lıro-epostyq jyry arqyly ulttyq rýhqa boılaýǵa múmkindik beredi. Al tańdaý nelikten M.Áýezov atyndaǵy Qazaq ulttyq drama teatryna tústi degenge keler bolsaq, óner ordasynyń ótkeni de, búgini de elimizdiń mádenı ómirimen astasyp jatyr. M. Áýezov atyndaǵy teatr - elimizdegi mańyzdy mádenı ortalyq qana emes, eń joǵary dárejedegi óner týyndylarymen tamsandyratyn, Melpomenany qurmet tutatyn kórermenniń ortasy. Teatrǵa qoldaý kórsetý arqyly jastar arasynda ulttyq mereke ıdeıasyn barynsha nasıhattaımyz, dástúr men tarıhymyzǵa den qoıǵymyz keledi. Qazaqstanda kondıterlik ónimder shyǵaratyn birden-bir ulttyq óndirýshi – «Baıan Sulý» kompanııasy osyndaı demeýshiligi arqyly halqymyzdyń mádenı murasyn saqtaýǵa úles qospaq», deıdi kompanııa prezıdenti.
M.Áýezov atyndaǵy Qazaq ulttyq drama teatrynyń dırektory, Qazaqstannyń eńbek sińirgen qaıratkeri Erkin Jýasbek «Baıan sulý» kompanııasymen yntymaqtastyq qara shańyraqtyń 100 jyldyǵy qarsańynda atqarylatyn is-sharalarmen sabaqtasyp jatqanyn jetkizdi.
«Júz jyldyq qarsańynda qazaq teatrynyń, teatr óneriniń órkendeýine úles qosqan klassıkalyq shyǵarmalardy túgendeýdi maqsat etip otyrmyz. Ulttyq teatr óneriniń damýyna zor úles qosqan Muhtar Áýezov, Ǵabıt Músirepov, Ilııas Jansúgirov sııaqty úlken abyzdarymyzdyń, solar jasaǵan qazaq dramatýrgııasynyń ozyq úlgilerin qaıta túgendep, halyqpen qaýyshtyrmaqpyz. Halqymyz ótkenin ańyz, jyrlaryna, lıro-epostyq shyǵarmalaryna arqaý etti. Osyndaı aýqymdy jaýhar dúnıemizdiń biri – «Qozy kórpesh – Baıan sulý» spektakliniń sahnalanýyna úlken óndiris orny «Baıan Sulý» kompanııasy qoldaý bildirip otyr. Shyn máninde bul shyǵarmany sahnaǵa alyp shyǵýdaǵy maqsat bir-birine degen syılastyǵy, súıispenshiligi, Qozy men anasynyń arasyndaǵy keremet qarym-qatynas ta búgingi jastar boıynda bolsa eken degen maqsatttan týyndap otyr», dep atap ótti E.Jýasbek.
Spektakldiń rejısseri, kóptegen shyǵarmashylyq qoıylymdarymen tanylǵan, pedagog, Qazaqstannyń óner qaıratkeri – Áýbákir Rahımov.
«Qazirgi kezde spektaklge teatrymyzdyń aǵa býyn akterleri Bekjan Turys, Baqtııar Qoja, Qozy men Baıannyń analary bolyp oınaıtyn Kúnsulý Shaıahmetova, Shynar Asqarova, jas akter Maǵjan Asaýbaev pen birneshe úlken róldi sahnalaǵan Indıra Qulmaǵanbet, sahna sáni bolyp júrgen taǵy da basqa jas býyn daıyndyq ústinde. Osylaısha kórermen taıaý kúnderde bıznes pen óner úılesiminiń arasynda jaýhar týyndyny kórermenge jarq etkizip kórsetýdiń sáti týmaqshy. Shyn mánisinde halyqqa jaqsy dúnıe kórsetý arqyly óndiris oryndarynyń ókilderi ult rýhanııatynyń, mádenı baılyǵynyń demeýshisi bola alady», deıdi teatr dırektory.
E.Jýasbektiń aıtýynsha, spektakldiń aldaǵy 15 sáýirde kórsetilýi de jaıdan-jaı emes. Jastarymyz «Qozy men Baıan» ǵashyqtar kúnin atap ótse degen izgi nıetpen sol kúnge josparlanyp otyr.
Búginde álem elderi óz tamyryna oralyp, ár halyq óz bolmysyna qaraı jaqyndaı túsýde. Memleket basshysy Q.Toqaev Senat spıkerligi tusynda ulttyq qundylyqtardy dáripteý maqsatynda «Áýlıe Valentın kúni» elimizdiń bolmysyna jat ári salt-dástúrine múldem qarama-qaıshy uǵym ekeni, sony jastardyń túsinýi qajettigin aıtqan bolatyn. Osy maǵynaly sózdiń qoǵamda «Qozy Kórpesh – Baıan sulý» kúnin atap ótý týraly túrli bastamalarǵa túrtki bolǵany da belgili.
Aıta ketetin basty másele, «Baıan Sulý» kompanııasy Qazaqstanda bilim berý, óner, sport jáne qaıyrymdylyqty damytýǵa baǵyttalǵan jobalardy qoldap keledi. «Tobyl» basketbol klýby, bıatlon quramasy, shahmatshy Bıbisara Asaýbaevanyń týrnıri, sondaı-aq kóptegen daryn ıesi kompanııa tarapynan turaqty qoldaýǵa ıe. Mysaly, Shavkat Rahmonovqa demeý kórsetken ýaqytta ol UFC deńgeıinde alǵashqy qadamdaryn jasaǵan jekpe-jek juldyzy bolatyn.
ALMATY
